सु थः सु कतः [बाखं]

मोहिनी चित्रकार

थौं ह्म झ्यातु । शोभां ब्वनेकुथिइ मवनेत क्वःछित । गुबलें खाताय् ग्वःतुली । गुबलें फेतुइ । वाथाक्क दनाः झ्याः न्ह्यने दनाः पिने स्वयाच्वनी । वया न नुगः थातय् दु, न धयाथे दु । छुं तंगु माले थें सर्गः पाखे स्वइ । न्ह्यानाच्वंगु सुपाँय् । थौं वया नुगः थातय् मलाः । मिखा पालुइ । गाच्वतं मिखा हुयाः तीजक न्हाय्कं थःपाखे स्वकी । थःगु किपा खनाः व थारान्हुइ ।

ब्वदंगु नौ थें च्वंगु सँ । न्यताःया छ्यंगू गुजिकाः । बुलुहुँ दनाः दराज चायेकी । पर्सि तःलय् स्वचाकातःगु किपा लिकाइ । न्हाय्कं न्ह्यने थःत व किपा ज्वःलाकाः ब्वइ । मिखा बुलु । किपा तिफ्याये फइमखु । चस्मा तयाः किपा क्वथीक स्वइ । वं ताःहाकः झसुकाः तइ । वलिसे इहिपा क्वःछिनातःह्म मिजं कलेजया पासा नरेन्द्र । मुसुहुँ न्हिलाच्वंगु किपां वयात हिस्याः थें ताइ ।

किपां वयात वंगु न्हापायागु इलय् घ्वाना छ्वल । नरेन्द्रलिसे इहिपा क्वःज्यूगु लाबला मदुनि । छुं म्वायेकं बहनी बेलि यानाः द्यंवंह्म वया मां सुथय् लिबाक्क तकं दनामवः । कलेज वनेत न्ह्याबलें थें मांयाके न्यनेत वंह्म वया मांयागु कोथा मचाः । खापा धिन । सःतल । हाःसः मदु । ताउत नं दुने कोथाय् छुं सः मवःसिनि लाय्लाय् बुयाः वं मांयात सःतल । जःलाखःलापिं जानाः खापा तछ्यानाः दुहांवन । वया मां ध्याकुंचाय् घ्वंस्यानाच्वंगु खनेवं वया हंसं थाय् त्वःतल । ह्म छह्म्रं च्वापु थें ख्वाउँ । गुबलय् गथे मन्त - सुनां नं मस्यू ।

शोभां न नवायेफत, न ख्वयेफत । व मांयागु ह्मय् भ्वःसूवन । वया निनिपिन्सं वयागु ह्मय् कुतिं न्यात । तिवांतिवां सःतल । झुमिंयंह्म थें वं छुं मचाः गबाय्त जायेकाः व ह्मुतु पकुचिंकाः उखेथुखे स्वल । मदुह्म मांयात कत्तिक घय्पुनाः ख्वःगु ख्वलं । तताह्म ख्वःगु सलं वया किपायागु नुगलय् फ्वय्पिल ला छु थें वनं मचासुलिं ख्वल । थौं वया मदुह्म मांलिसें झिंनिदँ दुह्म उगु इलय्याह्म किजा लुमनाः वं थःगु नुगः चीगु स्वःसां मिखां तिकिनंगु ख्वबि पनेमफु ।

वं भासं मस्यूनिबलय् हे बौनं त्वःता थकूपिं मचाखाचा कःघानाच्वंह्म इहिपा क्वःजी धुंकूह्म म्ह्याय् व तुतिं बांलाक मचूनिह्म काय्यात उमि मामं वानावन । वया इहिपा नसंफाल । वया निनिपिन्सं माःगु ग्वाहालि यानाबी स्वयंवर छगू जक यानाः इहिपा क्वचायेकेत स्वःगु नं खः । तर वयात खँ न्यंकेमफु । नरेन्द्रया छेँयापिन्सं नं वयात पियाच्वंगु नं खः । सुं मदुह्म याकः किजायात कलःगालय् वाना वनेगु वयागु नुगलं वयात उजं मब्यू ।

बिहाः यायेगुसा वहेलिसे मखुसा वं गुबलय् धाइ उबलय् जक याये धकाः नरेन्द्रं वयागु लँ स्वयाच्वंगु नं खः । किजाया निंतिं बिहाः मयासे च्वनेगु खँ क्वःछिनाः वं नरेन्द्रयागु मतिना जक मखुकि स्वापू तकनं चफुना छ्वल । चाबिनाः सुथय् लुयावइह्म निभाःद्यः थें मिखा चालकि वयागु न्ह्यने नरेन्द्र खनेदयेकः वइ । मिखा तिसिल कि नुगलय् लुयावइ । वाकु छिनाः वयागु किपा हुयाछ्वइ । ई न्ह्यानावन । बःचा धिकःह्म वया किजा ल्याय्ह्म जुल । कलेजयागु पढाइ क्वचाल । डाक्टर जुल । तर वया ब्वनेगु प्याःचाः मलं । किजाया निंतिं वयागु तपस्या पूवं थें ताल । तर अमेरीका वनाः एम.डी. सिधयेकाः लिहांवयाः ततानाप हे च्वनेगु पाः फयावंह्म किजायागु सः न्यनेत ब्वनेकुथिं लिहांवयाः फोन लिक्क च्वनाच्वनी । गबलें सुयागु, गबलें सुयागु फोन वइ । किजायागु सः न्यने मखनाः वं नुगः मछिंकी ।

वया थःगु इहिपा क्वःदःसां किजायात बिहाः यानाबीगु न्ह्यैपुगु ह्मगसपाखे मिखा ब्वया च्वनी । नुगलय् भौमचा जुइह्म मिसायागु किपा किया स्वइ । वया पासापिनि बांलाःपिं केहेँपिं सुं दु ला वालास्वइ । नुगलय् खँ वालकि च्वतं मातं, मातनं छ्यलिइ इरुथिरु जुयाच्वनी । गुबलें नरेन्द्र न्ह्यने दं वइ । व थारा न्हुइ । उघ्रिमय् तनावनी ।

छुं दँ लिपा वया किजा वइगु लुमंलुमं वयागु तुतिलिसें नुगः थातय् मदु । वया किजायागु कोथाय् वं लासा फांगा हिल । सुचुकुचु यात । किजाया थःगु नसा ज्वरेयाइ । एरपोर्टय् किजायात काःवन । वयागु मिखा नुगः नितां आकासय् । हवाईजहाजया सः ताइ । व किजायात स्वये हथाय्चाइ । घिरिघिरि खःचाय् सुट्केस न्ह्य न्ह्य तयाः वया किजा ल्यूल्यू । व ब्वां वनाः किजायात घय्पुइ । व थःलिसें ब्वनाहःह्म भुयुचित ह्मसिका बिल । - "थ्व जिमि याकः तता । तता, थ्व जिमि पासा ।" वं छुं न्यनेकने यायेन्ह्य किजां वयागु खँ कन - "निला प्यला थन च्वनाः थ्वयात नं नेपाः चाःहिके । उखे ज्या चूलायेवं ततायात नं उखे हे सःते । बांलाक तुतिं चुलकि ततायागु नापं जिगु इहिपा नं याये ।" व हर्रर न्हिल । खँ मथूसां वया भुयूचा नं न्हिल । छेँय् थ्यनेवं सुट्केस कोथाय् तयाः निह्मं पिहांवन ।

"तता जिपिं पिने हे नयावये ।"किजा वंगु च्यादँ दये धुंकल । थौं नं शोभां थःत अतिकं याकः ताल । लथ्यानातःगु पर्सि पुइकल । नरेन्द्रयात क्वथीक स्वल । अथे नं मिखां बांलाक मछू । मैनबत्ति च्याकाः स्वल । वयागु मिखा ख्वबिं भुन । वयात झुमिं यंकल । गुबाय्त जायेकाः वं मसांकुँ नवःगु चाल । मैनबत्तिं नरेन्द्रयागु किपा झौ यानाबिल । तीजक दनाः आकासय् स्वइ । हाकुगु सुपाँचं सर्गः भुनाः ख्युंसे च्वने धुंकल । वयागु नुगः थें तुं । वं ख्युंथाय् थः तनावं थें ताल । थःत मालेत स्वल । वया थः धयापिं सुं दुला वालाः स्वल । वं सुं हे खंके मफुत । बुलुहुँ बुलुहुँ ब्वनेकुथिइ च्वंपिं अबोध मस्तय्गु ख्वाः लुयावल । ववं ताःहाकःगु झसुकाः तल । आशाया छच्वः वं लुइकल । वया थः धयापिं सुं ल्यं दुसा वं ब्वंकाच्वंगु ब्वनेकुथिइ च्वंपिं मचाखाचा । उपिं प्रति माया व स्नेहं जाःगु वयागु नुगः । उकिं उमिगु भविष्य दयेकेगु हे वयागु आजु । थःह्मं बुइकातःपिं मखुसां थः मचा भाःपाः वनेगु थाय् नं व हे ब्वनेकुथि । उमिगु हे निंतिं ल्यंदनिगु ई फ्यायेगु वं क्वःछित ।

More Stories Like this