जग्गां यानाः बैंकतय्त संकट

जग्गाया भाः अझ हे कुहां वइगु सम्भावना

येँ( सन्ध्या टाइम्स)/बैंकतय्सं कसे याना हयेवं जग्गाया भाः कुहां वल। भाः कुहां वयेवं जग्गाया ज्या यानाच्वंपिं ताथ जुइगु शुरु जुल। उपिं ताथ जुइवं लिच्वः हानं बैंकतय्त हे लाः वल। जग्गाया ज्याय् वःगु मन्दीं यानाः लाःगु लिच्वःया न्हापांगु शिकार जूगु भिबोर विकास बैंक।
भिबोर विकास बैंक मुलतः जग्गा व हाउजिङ्ग व्यवसाय यायेत हे स्थापना जूगु खः। तर जग्गा व्यवसायय् वःगु मन्दीं यानाः बैंक डुबे जुइगु अवस्थाय् थ्यंगु दु। उकिं भिबोर बैंकयात डुबे जुइगुपाखें बचे यायेगु लागिं नेपाल राष्ट्र बैंकं म्हिगः वयात खुलाया लागिं धकाः ५० करोड त्यासा बिउगु दु ।

उगु बैंकय् वःगु संकटया कारण धइगु मेमेगु बैंक व वित्तीय संस्थाय् थें व्यवस्थापनया कमजोरी वा अधिकृततय् बदमाशी मखु। व छगू विशुद्ध आर्थिक कारण खः। बैंकिंक विज्ञतय् धापू कथं बजारय् वःगु मन्दीं यानाः हे थ्व बैंक डुबे जुइगु अवस्था वःगु खः ।

थ्व बैंकं हाउजिङ्ग व्यवसायया लागिं स्वनिगःया थीथी थासय् न्याना तःगु जग्गाया भाः कुहां वःगुलिं अन प्रस्तावित योजना न्ह्याके फयाच्वंगु मदु। सूत्रतय् कथं आः खुलाया दुने थ्व बैंकं थःपिंसं न्यानातःगु जग्गा धमाधम मिया मछ्वयेगु खःसा राष्ट्र बैंकयाके काःगु त्यासा पुले फइगु अवस्था मदु ।

भिबोर जक मखु मेमेगु बैंक व वित्तीय संस्थातय्सं नं आः हानं भाः थहां वनी लाकि धकाः पिया मच्वँसे थःके च्वंगु जग्गा मियाः त्यासा पुलेमाः धकाः विज्ञतय्सं सुझाव बिया हःगु दु ।

थ्व स्वयां न्ह्यः शेयर मार्केट फाइनान्स, सम्झना फाइनान्स, पिपुल्स फाइनान्स, गोर्खा बैंक संकट लाःगु खः। तर थुपिं बैंकय् संकट वःगुया कारण धाःसा मेमेगु नं दु। गथे कि गोर्खा बैंक व सम्झना फाइनान्स थःथःपिंत हे लगानी याःगुलिं डुबे जूगु खःसा शेयर मार्केट अनया कार्यकारी अध्यक्षया बदमाशीं यानाः डुबे जूगु खः। अजूचायापुगु संयोग छु धायेबलय् थ्व प्यंगू लगायत आः संकटय् लाःगु भिबोर बैंक फुकलीसं सञ्चालक समितिया अध्यक्ष व सीईओ छम्ह हे जुयाच्वंगु दु। थथे निगुलिं पदय् छम्ह हे मनू जुयाच्वंगु संस्थाय् जक अप्वः संकट वःगु जुयाः राष्ट्र बैंकं निगुलिं पदय् छम्ह हे मनू च्वने मते धकाः मौखिक निर्देशन नं जारी यायेधुंकूगु दु ।