'पंचशील' बारे निन्हुया शिविर
ख्वप (सन्ध्या टाइम्स)/२५५५ क्वःगु बुद्ध जयन्तीया लसताय् बौद्ध संघ ख्वपया ग्वसालय् बौद्ध जागरण शिविर जुल। ९ व १० तगिंया ब्वँमिपिंत लक्षित यानाः पञ्चशीलया विषयय् शनिवाः व आइतवाः निन्हुयंक उगु शिविर जूगु खः। शिविरय् मुक्कं गुंगू स्कूलया ३३ म्ह ब्वँमितय्सं ब्वति काःगु खः। शिविरया उलेज्या मुनि विहारया भिक्षु धम्मशोभन महास्थवीरं यानाबिज्याःगु खः ।
शिविरय् युवा बौद्ध समूह येँपाखें त्रिरत्न मानन्धरं बुद्धकालीन समाजया सामाजिक, आर्थिक व धार्मिक अवस्था बारे प्रशिक्षण बियादीगु खः। अथे हे गौतमवीर बज्राचार्य, कृष्ण कुमार प्रजापति व भिक्षु संघरक्षित स्थवीरपिंसं पञ्चशीलया विषयय् प्रशिक्षण बियादीगु खः।
शिविर क्वचायेकाः त्रिरत्न शाक्यया अध्यक्षताय् जूगु समापन समारोहय् प्रशिक्षार्थीपिं अणु गरुङ्ग, सन्तोष सेवा व सम्झना जौरुं थःपिं बुद्धया शिक्षां जागृत जुयागु खँ प्वंकादीगु खःसा प्रधानाध्यापक धर्मसुन्दर तुलाधर, पद्मसुन्दर शाक्य व संघरत्न शाक्यपिंसं नुगःखँ प्वंकादीगु खः ।
रत्नायक कोषया आर्थिक ग्वाहालिइ जूगु उगु शिविरय् रामकृष्ण वैद्य व अनागारिका मीरा पाहांकथं झाःगु खः। ज्याझ्वलय् रत्नसुन्दर शाक्यं लसकुस व लक्ष्मीचन्द्र बज्राचार्यं सुभाय् न्वचु बियादीगु खः ।
