गुण्डागर्दी यायेगु लाइसेन्स जुल राजनीति

विराटनगरय् छम्ह स्थानीय पत्रकारयात छगू राजनीतिक पार्टीया कार्यकर्तातय्सं बाम्ह सिक्क दाःगु घटनायात कयाः थ्व इलय् सकलें पत्रकारत तम्वयाच्वंगु दु। थःपिनि बारे समाचार च्वल धकाः 'नागरिक' न्हिपौया पत्रकार खिलानाथ ढकालयात दाये फक्व दायाः एमाले समर्थित ल्याय्म्हतय् पुचः युथ फोर्सया कार्यकर्तातय्सं उगु ताण्डव क्यंगु खः। एमालेया हे नेतृत्वय् दुगु सरकार व राजनीतिक दलया सुरक्षा कयाः युथ फोर्सया मोरङ 'डन' पर्शुराम बस्नेत व वया पासा मनोज राई आः तकं बेपत्ता जुयाच्वंगु दनिसा वकुन्हु बहनी पत्रकार ढकालयात फोन यानाः सःतूम्ह युथ फोर्स कार्यकर्ता रोहित कोइरालायात धाःसा प्रहरीं ज्वना तःगु दु। थ्व घटनां विराटनगरया पत्रकार जक मखु स्थानीय व्यापारी व बुद्धिजीवीतय्त नापं आक्रोशित याना बिउगु दु ।

थ्व घटनां यानाः पत्रकारतय्सं च्वयाः रोजगारी यायेगु थःपिनि ज्याय् तकं हाथ्या वयाच्वंगु महसुस याये मालीगु अवस्था ला द हे दु। व स्वयां नं ग्यानापुगु खँ ला छु धायेबलय् समाजया गुण्डा, लफंगा, तस्कर फुक्क हे आः राजनीतिक पार्टीया नेता व कार्यकर्ता जुयाः सक्रिय जुयाच्वंगु खँया दसि नं थुकिं ब्वया बिउगु दु। न्हापा गुण्डातय्त राजनीतिक पार्टीतय्सं सुरक्षा जक बीगु खः, आः अज्याःपिं गुण्डात राजनीतिक पार्टीया कार्यकर्ता हे जुयाः सक्रिय जुयाच्वंगु दु। राजनीतियात उमिसं गुण्डागर्दी यायेगु वैध लाइसेन्स दयेकाः छ्यलाच्वंगु दु। पत्रकार ढकालयात जूगु आक्रमणं थुकिया स्पष्ट किपा ब्वयाच्वंगु दु। थुकियात इलय् मपन धाःसा कन्हय् गुण्डागर्दी व राजनीति दथुया सालुगु ध्वः नं हुया वनेत ताः ई काइ मखु ।

More Stories Like this