मैत्रय बुद्ध झी दथुइ हे दी - ४

बिनोद साय्मि (आल)

'केन्या टाइम्स'या संपादक जब् मुतुङ्गिं थुपिं दक्व लु खंगु व थुकिया किपा नं कयादीगु खः। वय्कः सम्पादक भाजुं थःगु च्वसुइ च्वयादिल, "नाङ्गा तुति, ग्वाय्दारि दुम्ह, तःधिकःम्ह, तुयुगु वसः फिनाः बेतालि तपुलि थें पुया तःम्ह छम्ह न्हूम्ह मनू चर्चय् प्रार्थना जुयाच्वंगु मनूतय् हुलमुल दथुइ फसं तुं पिलू वल। वय्कःयात खनेवं अन मुनाच्वंपिं सकसिनं जेसस क्राइस हे थ्यंकः वल धकाः भावविभोर सलं "जेसस ! जेसस ! येशु ! येशु" छि झायादिल ! लसकुस दु जेसस ! लसकुस दु, जेसस !" धइगुं सः मनूतय् म्हुतुं पिज्वल। वय्कः न्हूम्ह पाहां स्थानिय स्वाहिल भाषां न्ववानादिल। वय्कलं धयादिल, "केन्याया मनूत सुरक्षित व आशिर्वाद दु।" वय्कलं स्थानीय स्वाहिल भासं न्ववानादीबलय् वय्कःयाके गुगुं कथं भाय् मवः। वयकलं अन १८ मिनेट ति खँल्हाबल्हा ब्याकल। वय्कःया जवंखवं दुपिं आपाःसिया ल्वय् मुक्कं हे क्वलाना वन। लिहां वनेगु झ्वलय् वय्कःयात गुरनाम सिंहं कारय् लिफ्ट बिउगुयां भचा लिपा वय्कः कारं कुहां वयाः छुं पलाः न्यासि झाल, तर गथे फसं पिलू झाःगु खः अथे हे फसय् तुं बिना वन ।

थथे उगु प्रार्थना ज्याझ्वलय् पिलू झाःम्ह महात्मा जेसस मखुसें हलिंया हे गुरु मैत्रय खः धकाः बेन्जामिन क्रेमं लिपा क्वःछिनादिल। वय्कः थुकथं न्हापांखुसी सार्वजनिक जुइधुंकाः तःक्वः हे बासः, सछि निसः मनूत मुनाच्वंगु पुचलय् सावर्जनिक जुइधुंकल। गबलें कश्चियन पुचलय्, गबलें मुस्लिम पुचलय्, गबलें हिन्दू पुचलय् , गबलें बौद्ध पुचलय्। तर वय्कः थथे सार्वजनिक जूगु खँ धाःसा मिडियाय् पिहां मवःगु जुयाच्वन ।

मेरि सिनाइदा अकत्सां कनादी, मैत्रय थन चर्चय् झासांनिसें ल्वय् लायेकः वइपिं, प्रार्थना याः वइपिं न्हापा स्वयां अप्वयाच्वंगु दु। अकत्सां धयादी, मनूतय्गु ल्वय् लायेकीम्ह जि मखु जिगुपाखें द्यवं लायेकीगु जक खः। आः जिं स्पष्टं जिगु न्हाय्पनय् द्यवं जिनाप खँ ल्हाःगु ताः। न्हाय्कनय किपा स्वये थें जिगु मिखा न्ह्यःने लु पिलू वइ। जितः अन स्व थन स्व धकाः लँ क्यनी। जिं मनूतय् नुगःपाय् उमित छु ल्वय् जुयाच्वन, छाय् जूगु च्वयातःगु हे खनी व जिं उगु ल्वचं लाना वनेमा धकाः फ्वनेवं उमित ल्वचं त्वःता वनी ।

मैत्रयनाप टेलिभिजनय् खँल्हाबल्हा:
मैत्रय दकलय् न्हापांखुसी अमेरिकाया छगू नांजाःगु टेलिभिजनलिसे सन् २०१० जनवरीइ खँल्हाबल्हा बियादिल तर मैत्रयया नामं मखु, छम्ह साधारण मनू कथं। "मैत्रयं छुं न्हि न्ह्यः तिनि अमेरिकाया टेलिभिजनं इन्टरभ्यू बियादिल" धइगु बुखँ धाःसा खँल्हाबल्हा बीधुंकाः छवाः लिपा जक बेन्जामिन क्रेमं सन् २०१० जनवरी १४ कुन्हु लण्डनय् जूगु छगू पब्लिक लेक्चरय् सार्वजनिक यानादिल। थुगु न्हापांगु खँल्हाबल्हा लिपा वय्कःया इन्टरभ्यू अमेरिका, जपान, युरोप नापं संसारया थीथी थासय् बीगु ग्वःसाः दु। भाजु क्रेमं धयादी, "मैत्रयं आः थथें मैत्रय जि हे खः धयादी मखुनि। गबलय् ई त्यइ व आपालं आपालं मनूतय्सं मैत्रयया पलाःयात कयाः खँल्हाबल्हा ब्याकी, उगु ई थ्यनेवं वयकः मैत्रय नामं हे पिलू झाइ। मैत्रय थःगु हे नामं सकियां न्ह्यःने पिलू वयेगु न्हि क्वःजीवं उगु न्हिया सुचं सकसितं न्ह्यः हे जुइ। मैत्रयं थःत थम्हं मैत्रय जुयाः पिलुइगु न्हि कुन्हु वय्कःयात सकस्यंा छम्ह म्हसिउगु ख्वाः जुया लुइकी तिनि ।"

मैत्रय बिज्यानाः न्ह्याकूगु खुल्ला ज्याझ्वःया लसकुस चिं सर्गतय् थीगु नगुत: सन् २००८ डिसेम्बरय् १२ य् शेयर ईन्टरनेशनल फाउन्डेशनं छगू मू बुखँ पित बिल, याकनं हे सर्गतय् तसकं थीगु नगुत खने दयेत्यंगु दु। थुगु न्हूगु नगु खने दुगु मैत्रय झाःगुया लसकुस बुखँया चिं खः। धाथें ला थुपिं नगु मखुसें स्पेश यान खः। थुपिं स्पेश यानत मुक्कं प्यंगः सर्गतय् दु। पूर्व, पश्चिम, उत्तर व दक्षिण यानाः प्यथाय् खने दइ व थुपिं झीगु हे सौर्य मण्डलया तःकेहेँ ग्रहत जुपिटर, मंगल, भेनस व मेगु छगू ग्रहं छ्वया हःगु खः। थुपिं तसकं ततःग्वःगु स्पेश यानत झीगु पुथ्वीं तसकं तापाः मजुसे न्ह्यःने हे दु। थुपिं नगु थें खने दुगु स्पेश यानतय्सं थःगु ऊन (रंग) हिलेगु, बां (आकार) हिलेगु, छक्वः छक्वः खने दइगु, छक्वः छक्वः खने मदइगु जुया वनीगु आदि गुणत (सर्गतय् खने दइगु नगुइ थुज्वःगु गुण दइ मखु) न्हापा भविष्यवाणी यानातः थें हे क्यंगु खः। थुगु विशेष स्पेश यान व थुकिया अजूचायापुगु गुणत हलिंया आपालं थासं खंपिंसं रिपोर्ट याःगु दु। सन् २००९ जनवरी ९ निसें नर्वे, कोस्टारिका, अमेरिका, युक्रेन, जापान, चीन, दुबई, नेदरल्याण्ड, बेलायत नापं आपालं देय्या मनूतय्सं खंगु रिपोर्ट व थुमिगु थीथी बां व ऊनया किपात थीथी वेब साइटय् तयातःगु दु। संसारया बिभिन्न थासं पिदनीगु पत्रिकात नापं टेलिभिजन च्यानलतय्सं थुकिया बुखँ नं बिउगु दु ।

(कथहं)

More Stories Like this