सम्मानजनक समायोजन

सेना समायोजन व संविधानया विषयलय् वइगु स्वलाया दुने न्हयथने बहः जुइक ज्या जुइत्यंगु दु । छगू मेगु विषयनाप स्वानाच्वंगुयात आः वा कन्हय् व्यागल तयेगु ज्या जुइमज्यू व यदि अथ्य जुल धाःसा स्वंगू दलया दथ्वी जूगु न्यागू बुंदे सहमति हानं घरापय् लायेत वेर मदु । एकीकृत नेकपा -माओवादीं) दकले न्हापां न्हूगु संविधान दयेकेगु व दयेकेत माःगु वातावरणयात बहः व्यूगु खःसा ल्यं कांग्रेस व एमालें दकले न्हापां सेना समायोजन अले जक संविधान दयेकेगु यात प्राथमिकताय् तःगु खः । तर न्यागू बुंदे सहमतिं उकिया समस्या छुंं गुथं समाधान यायेगु धयागु कुतः जूगु दु । गनतक्क सेना समायोजनया खँ दु थ्व पूर्णत सन्तुलित, सम्मानजनक व वैज्ञानिक जुइमाः । नेपाली सेनायामोडालिटी न्ह्याये त्यंगु समायोजन प्रति सहमति जूसां व सम्मानजनक मजुल वा छुंनं कथं अलमलय् यायेगु ज्या जुल धाःसा थ्व समायोजन नं घरापय् मलाइ धकाः धाये फैमखु ।

सेना समायोजनयाये न्ह्यः छगू राष्ट्रिय सुरक्षा नीतिया आवश्यक जूगु खँयात थन उलि महत्व व्यूगु खनेमदु । सेनायात लोकतान्त्रिकरण यायेगु खँयात नं त्वहफ्यूगु महसूस यानाहःगु दु । च्याद्वलंनिसें झिद्वः तक्कया जनसेना समायोजन यायेगु खँ जुयाः च्वंसा संख्या किटान ज्या क्वचाःगु मदु । सेना समायोजन सम्वन्धित न्हापा गुलि नं मोडालिटी न्ह्यःने वल व फुक्कयात छख्य चीकाः आः या मोडालिटी उलि तर्क समेत खनेमदु । दसिया नितिं नेपाली सेनाया महानिर्देशया कमाण्डय् जनसेना तयेगु खँ वयाच्वंगु दु । अथ्यहे पुनस्र्थापना, राहत सम्वन्धी प्याकेजया खँ, थौं तक्क नं स्पष्ट मजूनि । अथ्यहे संख्या, कार्यक्षेत्र व पदतय्गु अवस्थायात कयाः नं छलफल यायां न्ह्याः वनेगु खँ नं उलि मज्वं ।

सेना समायोजन व संविधान निर्माण निगुलिं नाप नापं न्ह्याः वनेमाः । सेना समायोजनया खँ सन्तोषजनक ढंगं न्ह्यःने मवंतले, जनसेनायाहे कमाण्डय् वनेगु, ल्वाभः तयातःगु कन्टेनरया ताःचा सरकारयात लःल्हायेगु व वन वाः उद्योगय् पाले तयेगु ज्या जक जुल धाःसा जनसेनायात समान याःगु ज्या मजुसे अपमान यायेगु जुइ । सम्मानया अर्थ आत्मसमर्पण मखु । थ्व खँ सकस्या सीके व थुइकेगु बांलाइ ।
सेना समायोजन यानाः माओवादीयात निशस्त्र यायेगु कथं कांग्रेस-एमाले वयाच्वंगु दु । थ्व सेना समायोजनया लँपुइ अनुत्पादक व क्वपुं विचाः खः । सेना समायोजनया अर्थ १० दँया जनयुद्धया सही ढंगं सम्वोधन यायेगु खः । उकिया गरिमा व महत्वयात हनेगु खः । थ्व खँयात थुइकेगु व आत्मसात यायेगु स्वयेमाः ।

More Stories Like this