युद्धकालय्सिबें खतरा

येँ (झीगु स्वनिगः)

सूचना तथा संचार मन्त्री अग्नी प्रसाद सापकोटां श्रमजीवि पत्रकारतय्गु अवस्था युद्धकालय्सिबें नं थौंया अवस्थाय् तसकं जोखिमपूर्णक व खतरनाक जुया वनां च्वंगु धयादिगु दु । रिपोर्टस क्लबं ग्वसाःग्वःगु साक्षात्कार ज्याझ्वलय् न्वंवायेगु झ्वलय् मन्त्री सापकोटां अथे धयादीगु खः । वय्कलं आःया थेंजाःगु पत्रकारतय्त जुयाच्वंगु मदिक्क आक्रमणया घटना युद्धकालय् हे तविं मजू धकाः दावी नं यानादिल । पत्रकारतय्गु आर्थिक व भौतिक निगु हे ल्याखं दयनीय अवस्था दुगु खँ न्ह्यथसें मन्त्री सापकोटां पत्रकातय्त जुयाच्वंगु आक्रमणय् न्ह्यागु हे पार्टी बाय् संगठन दुसां इपिं उन्मुक्ती जुइफैमखु धकाः ख्याच्वः नं बियादिल ।

वय्कलं पत्रकारतय्त आक्रमण याःपिन्त ज्वनाः कारवाही यायेगु विषयसं गृहमन्त्रीलिसे तःक्वःमछि हे सहलह ब्याके धुनागु नापं माल धाःसा प्रधानमन्त्रीलिसे नं खँ ल्हायेगु जुइ धकाः प्रतिबद्धता प्वंकादिल । विराटनगरय् युथफोर्सया कार्यकर्तातय्सं पत्रकार खिलानाथ ढकालयात आाक्रमण याःगु घटनायात कयाः थःम्हं पत्रकार ढकालयात नापलायेगु जुइ धयादिसें थःम्हेसिया प्रेस सल्लाहकारयात नं थुगु विषयसं विस्तृत अध्ययन यानाः प्रतिवेदन बिइत निर्देशन नं बियादिल । वय्कलं श्रमजीवि पत्रकारत आर्थिक व भैतिक रुपं समस्या जूगुलिं स्वतन्त्र कथं सूचना तकं सम्प्रेसन याये मफुगुयात ध्यानय् तयाः तत्काल हे मन्त्रालयपाखें पत्रकारतय्गु विमाया व्यवस्था यायेगु योजना थःम्हं दयेका च्वनागु दु धकाः नं कनादिल ।