न्याय क्षेत्रयात भर्ति केन्द्र दयेकूगु

येँ (झीगु स्वनिगः)

वर्तमान सरकारय् एकीकृत नेकपा -माओवादी) पाखें कानुन मन्त्री जुयादीम्ह प्रभु शाह नं न्याय क्षेत्रय् प्रधानमन्त्रीं याःगु नियुक्ति लित मकाल धाःसा थःम्हं राजीनामा बिइगु धकाः ख्याच्वः बियादीगु दु ।
म्हिगः विहिवाः थःगु हे मन्त्रालय् पत्रकार सम्मेलन यानाः मन्त्री शाह नं उगु कथं ख्याच्वः बियादीगु खः । प्रधानमन्त्री खनालं थःलिसे छुं हे खँय् सहलह मब्याकूसे नियुक्ति याःगु नापं न्याय क्षेत्रयात कार्यकर्ता भर्तिकेन्द्र दयेकेगु ज्या यात धकाः द्वपं तकं बियादीगु दु । वयकलं न्याय परिषद, महान्यायाधीवक्ता व विश्व विद्यालय अनुदान आयोगय् प्रधानमन्त्री खनालं विधी कथं हे नियुक्ति मयात धकाः असन्तष्टी प्वंकुसें अथे ख्याच्वः बियादीगु खः । नियुक्तिया सवालयात कयाः थःम्हं स्वयं प्रधानमन्त्रीयात सचेत याये धुनागु धकाः तकं कानुनमन्त्री साह नं धयादिल ।