सहमतिया नितिं स्वंगू कार्यदल

येँ (झीगु स्वनिगः)

एकीकृत नेकपा (माओवादी)या नायः पुष्पकमल दाहाल प्रचण्डया नेतृत्वय् न्हूगु संविधान दयेकेगु झ्वलय् ब्वलंगु विवादयात ज्यंकेगु नितिं दयेकातःगु संविधानसभाया संवैधानिक समिति अन्तर्गतया उप समिति म्हिगः विहिवाःनिसें हाकनं सक्रिय जूगु दु । संविधानसभाया म्याद थप याये धुंकाः न्हापांखुसि म्हिगः सुथय् हे उप समितिया मुँज्या च्वनाः संविधानया न्हापांगु एकीकृत मस्यौदा तयार यायेगु नितिं स्वंगू कार्यदल दयेकूगु दु । उगु मुँज्यां राज्यया शासकीय स्वरुप, निर्वाचन प्रणाली व राज्यया पुनर्संरचनाया सवालय् दलतय्गु दथुइ जुयाच्वंगु विवाद ज्यंकेगु नितिं ब्यागलं ब्यागलं कथंया स्वंगू कार्यदल दयेकेगु धकाः खँ क्वःछ्यूगु खः ।

उगु कार्यदलय् सु सु दुजः कथं तयेगु धकाः थौं सुक्रवाः च्वनीगु उप समितिया मुँज्यां खँ क्वःछिइगु जूगु दु । न्हूगु संविधानया नितिं दलतय्गु दथुइ राज्य पुनर्संरचना, शासकिय स्वरुप व निर्वाचन प्रणालीया विषयसं विवाद ज्यंके ल्यं दनिगु जुयाः उगु स्वंगू हे समितिया प्रतिवेदनयात कयाः सहमति ब्वलंकेत अःपुकेगु नितिं अथे कार्यदल दयेकेगु ज्या जूगु खः धकाः नेतातय्सं धयादीगु दु । उगु उपसमितिइ माओवादीया नायः प्रचण्ड नापं कांग्रेसया संसदीय दलया नेता रामचन्द् पौडेल, प्रधानमन्त्री नापं एमालेया नायः झलनाथ खनाल व मेमेगु दलया शीर्ष नेतात दुथ्यानाच्वंगु दु । वंगु जेठ ६ गतेनिसें उग उपसमितिया मुँज्या तकं च्वने मफयाच्वंगु खः । लिपांगु मुँज्यां न्हूगु संविधानया नां नेपाःया संविधान धकाः तयेगु खँ क्वःछ्यूगु खः । जेठ १४ गते स्वंगू दलया दथुइ न्यागू बुँदाया सहमति कार्यान्वयन यायेत सभामुख सुवासचन्द्र नेम्वाङया नेतृत्वय् दयेकूगु अनुगमन समिति थ्व हे जेठ ३० गते संसदय् न्ह्यब्वइगु जूगु दु ।