न्हापांगु मस्यौदा भदौ १ गते
थनिंनिसें उपसमितिं हाकनं ज्या न्ह्याकल
येँ (सन्ध्या टाइम्स)/न्हूगु संविधान निर्माणया झ्वलय् विवाद जुयाच्वंगु विषय ज्यंकेगु नितिं संविधानसभाया संवैधानिक समिति अन्तर्गत दयेकूगु उपसमितिया थौं सुथय् च्वंगु बैठकं न्हूगु संविधानया मस्यौदा तयार यायेगु नितिं कार्यतालिका दयेकूगु दु ।
संविधानसभाया म्याद स्वला थप याये धुंकाः उपसमितिया बैठक थौं न्हापांखुसी च्वनाः उकियात क्रियाशील याःगु खः। सिंहदरवारया समितिया ज्याकुथी च्वंगु म्याद थप लिपाया न्हापांगु बैठकं हे न्हूगु संविधानया मस्यौदाया धलः तकं सार्वजनिक याःगु दु ।
संविधान निर्माणय् खने दयाच्वंगु विवादयात ज्यंकेत उपसमितिं भदौ १ गते तकया दुने न्हापांगु मस्यौदा तयार यायेगु कथं ज्या यायेगु धकाः तकं निर्णय याःगु दु।
विवाद ज्यंकेगु नितिं गठन याःगु उगु उपसमितिया नेतृत्व एकीकृत माओवादीया अध्यक्ष प्रचण्डं यानादीगु दुसा प्रधानमन्त्री नापं एमालेया अध्यक्ष झलनाथ खनालंनिसें फुक्क धइथें मूमू राजनीतिक दलया शीर्ष नेतात उगु समितिइ दुथ्यानाच्वंगु दु। न्हूगु संविधानया मस्यौदा तयार यायेगु निंतिं उपसमितिया बैठक कन्हय् च्वनाः तिब्रगतिं ज्या याना वनेगु लागिं नं थौंया बैठकय् नेतातय्गु दथुइ सहमति जूगु दु ।
उपसमितियात राज्य पुनर्संरचना नापं राज्य शक्ति बाँडफाँट समितिया प्रतिवेदनयात कयाः विवाद जुयाच्वंगु धयातःगु ७८ गू बुँदा व थ्व सिबें न्ह्यः हे ल्यं दनिगु २१ गू बुँदायात कयाः सहमति ब्वलंकेगु जिम्मेवारी बियातःगु दु।
संवैधानिक समितिं १०/१० न्हुया दुने थःगु ज्याया प्रगति विवरण लःल्हायेगु जिम्मेवारी नापं बियाः वंगु बुधवाः उपसमितिया म्याद हाकनं थप याःगु खः ।
