संसद अझं अवरुद्ध याइगु
न्हूगु सरकार गठनय् समस्या
एमाले-कांग्रेस गठबन्धन सरकारया निंतिं बहुमत सभासद्तय् हस्ताक्षर सभामुखयात लःल्हायेधुंकाः सरकार गठनया निंतिं सदन सुचारु यायेत थौं प्रधानमन्त्री व सभामुखया दथुइ जूगु खँल्हाबल्हा असफल जूगु दु ।
वय्कःपिनि दथुइ जूगु खँल्हाबल्हाया झ्वलय् प्रम प्रचण्डं राष्ट्रपतिया पलाः भिंकेगु ज्या राजनीतिक पार्टीतय्सं मयाःतले थःपिंसं सदन न्ह्याके मबीगु अडान सभामुखयात प्वंकादीगु खः ।
प्रम प्रचण्डं राष्ट्रपतिया पलाः भिंकेगु निंतिं राजनीतिक सहमति दयेका बीत नं सभामुख नेम्वाङयात इनाप यानादीगु खँ धाःगु दु ।
खँल्हाबल्हाया झ्वलय् सभामुख नेम्वाङं थ्व विषय सदनया हे विषय जुइधुंकूगुलिं सदनय् थुकिया बारे सहलह यायेगु खँ धयादीगु खःसा लिसलय् प्रम प्रचण्डं सदन सुचारु यायेधुनेवं राजनीतिक पार्टीतय्सं राष्ट्रपतिया पलाः भिंकेगु कुतः मयाइगु जूगुलिं न्हापा राजनीतिक पार्टीतय्सं राष्ट्रपतिया पलाः भिंकेगु बारे प्रतिवद्धता प्वंकेमाःगु खँ नं वय्कलं सभामुखयात धयादीगु खः ।
खँल्हाबल्हाया झ्वलय् प्रम प्रचण्डं सतकय् मुंकूगु हस्ताक्षरया महत्व मदु धासें दकलय् न्हापा राजनीतिक पार्टीतय् दथुइ राष्ट्रपतिया पलाः भिंकेगु बारे सहमति जुइमाःगु थःगु पार्टीया अडान जूगु खँ नं सभामुखयात कनादीगु खः ।
सरकार गठनया प्रकि्रया आः सदनय् वयेधुंकूगुलिं सदन न्ह्याकेत प्रधानमन्त्रीयात इनाप यानादीगु खः ।
थ्वहे झ्वलय् थौं सुथय् च्वंगु माओवादी केन्द्रीय सचिवालयया बैठकं राष्ट्रपतिया पलाः मिभंकूतले संसद अवरुद्ध यानां तुं च्वनेगु निर्णय याःगु दु । लिसें बैठकं राष्ट्रपतिया पलाः विरुद्ध सडकय् नं निरन्तर रुपं आन्दोलन यायेगु निर्णय नं याःगु दु ।
थ्वहे झ्वलय् थौं कार्यव्यवस्था परामर्श समितिइ प्रधानमन्त्रीया निर्वाचनया ई क्वःछीगु तयारी यानाच्वंगु दु । यदि थौं नं सदन अवरुद्ध जुल धाःसा सदनय् सूचना तिकाः जूसां नं निर्वाचन तालिका सार्वजनिक यायेगु तयारी कार्यव्यवस्था समितिं यानाच्वंगु खँ सीदुगु दु । उखे माओवादीं धाःसा कार्यव्यवस्था समितिया बैठक तकं न्ह्याके मबीगु नीति दयेकाच्वंगु खँ नं सीदुगु दु । माओवादीं सदन अवरुद्ध यानाच्वंगु कारणं थौंया सदन नं अवरुद्ध जुइगु अवस्था ब्वलंगु दुसा थुकिं यानाः न्हूगु सरकार गठनया प्रकि्रया तकं अवरुद्ध जू वनीगु परिस्थिति ब्वलंगु खँ नं सम्बन्धित सूत्रं धाःगु दु ।
