अदालतय् मुद्दा त्याकाबीम्ह द्यः

येँ/न्हापा न्हापा डाक्टर कम्पाण्डर धइपिं मदु। अय् जुयाः स्वास्थ्यय् छुं भचा खराबी जुल धाःसां नेवाःतय् द्यः पुज्याइगु चलन दु। उकिसनं शरीरया गुगु अंग स्यात वहे अंगया स्याः लंका बीपिं द्यःत स्वनिगःया थीथी थासय् दु। गथे कि वास्याः द्यः, न्हाय्पंस्याः द्यः, मचा बुइके अःपुका बीम्ह द्यः, थी मजिउ जुइका बीम्ह द्यः आदि आदि।
तर नेवाःतय् दथुइ वा स्याःगु व न्हाय्पं स्याःगु लंका बीपिं जक मखु अदालतय् मुद्दा लानाच्वंगु दुसा अज्याःगु मुद्दा त्याका बीम्ह द्यः नं दु धइगु खँ धाःसा म्हो जक मनूतय्सं सिउ ।

दँय्दसं सिथि नखः कुन्हु जात्रा यायेमाःम्ह न्हूघःया सिथि द्यः वास्तवय् मुद्दा त्याका बीम्ह द्यः नं जुयाच्वन। न्हापा चिचीधंगु मुद्दा धइगु जुइ मखु। मुद्दा जुइगु धइगु राजकीय मुद्दा वा व्यापारिक कारोबार सम्बन्धी मुद्दा खः। अथे मुद्दा लानाच्वंपिं सुं दुसा उगु मुद्दा त्याइ लाकि त्याइ मखु धकाः स्वयेगु लागिं मनूतय्सं सिथि द्यःयाथाय् मत च्याकः वनीगु चलन दु। अबलय् वकिल धइपिं नं मदु। मत च्याःगु स्वयाः अनया पाःलाःतय्सं हे मत बांलाक च्याःगु दु वा मदु धया हइ। मत बांलाक च्यात धाःसा मुद्दा त्याइगु व बांलाक मच्यात धाःसा मुद्दा बुइ धइगु जनविश्वास दु ।

थौंकन्हय् सिथि द्यःयाथाय् द्यःपाःलाः च्वनादीम्ह भाजु विष्णुलाल श्रेष्ठया अजि कृष्णकुमारी श्रेष्ठं वि.सं.२०३६ सालतक नं मत च्याःगु स्वयाः ज्या सफल जुइ वा मजुइ धकाः बांलाक धायेफु। आः वय्कः मदयेधुंकाः धाःसा अन मत च्याकः वइपिं म्हो जुया वंगु खँ धायेगु याः ।