जन्तीया बस दुर्घटना जुयाः प्यम्ह सित
येँ (सन्ध्या टाइम्स)/झापाया जुरोपानी २ बुरीसिमल धइगु थासय् वंगु चान्हय् जन्ती ज्वनाः वंगु बस फातापुलाः प्यम्ह मनू सीगु दुसा मेपिं २० म्ह घाःपाः जूगु दु ।
कोहवरा चार धइगु थासं वंगु जन्ती बस जुरोपानीया १ नं. वडाय् भम्चा कयाः लिहां वयाच्वंगु इलय् दुर्घटना जूगु खः। दुर्घटनाय् लानाः कोहवराया २५ दँ दुम्ह प्रमसिंह ताजपुरिया, १८ दँ दुम्ह राजु ताजपुरीया, ५५ दँ दुम्ह विश्वेश्वर शर्मा घटनास्थलय् हे सीगु खः। इपिं बसया छतय् च्वना वयाच्वंपिं खः। बस फातापूगु इलय् उपिं वहे बसं ल्हानाः सीगु खँ प्रहरीं धाःगु दु। उगु घटनाय् लानाः गम्भीर घाःपाः जूम्ह कोहवराया हे १९ दँया गोविन्द ताजपुरिया दमकया अस्पतालय् वासः याकुयाकुं सीगु खः ।
उगु घटनाय् लानाः घाःपाः जूपिं मध्ये गुम्हेसित विराटनगरया नोबेल मेडिकल कलजय् व ल्यं दुपिंत दमकया लाइफ लाइन अस्पतालय् वासः याकाच्वंगु दु। तसकं चिब्यागु लँ अले लँय् नं गाःगाः दुगुलिं मे. १ ख ४६७ नम्बरया उगु बस फातापू वंगु खः। लाइफलाइन अस्पतालय् वासः याकाच्वंपिनि अवस्था सामान्य दुगु खँ नं प्रहरीं धाःगु दु ।
दुर्घटनाय् लानाः सीपिनिगु लाश दमकं वंगु क्रेनं बसयात ल्ह्वनाः तिनि लिकायेगु ज्या जूगु खः। इहिपा याःम्ह मिजं व भम्चा धाःसा कारय् च्वनावःगुलिं इपिं सकुसल अवस्थाय् दुगु खँ स्थानीय मनूतय्सं धाःगु दु ।
