धाः बाजं बारे गोष्ठी
येँ (सन्ध्या टाइम्स)/नेपाल संगीत तथा नाट्य प्रज्ञा प्रतिष्ठानया ग्वसालय् 'धाः बाजं: थौंया परिप्रेक्ष' विषयक कार्यशाला गोष्ठी जुल। ज्याझ्वलय् बौद्ध विद्वान प्रा. सुवर्ण शाक्यं धाःबाजं बारे ज्यापौ न्ह्यब्वयादीगु खःसा संस्कृतिविद् तेजेश्वरबाबु 'ग्वंगः' जुं उकिया समीक्षा यानादीगु खः ।
थनया रसियन कल्चर सेन्टरय् जूगु उगु ज्याझ्वः प्रतिष्ठानया कुलपति अम्बर गुरुङ्गया सभापतित्वय् जूगु खःसा नेपाल ललितकला प्रज्ञा प्रतिष्ठानया कुलपति किरण मानन्धर मूपाहां कथं झाःगु खः ।
अन न्ह्यब्वःगु ज्यापती संगीतया पृष्ठभूमि, गुंला बाजंया महत्व, आवश्यकता व थुकिया भविष्य बारे नं चर्चा यानातःगु खः। थुगु बाजं म्वाकेत वयाच्वंगु थीथी समस्याया बारे नं ज्यापती चर्चा यानातःगु खः। ज्याझ्वलय् प्रा. शाक्यं ज्यापौ ब्वनाः न्यंकादीगु खःसा प्रयोगात्मक रुपं च्वः बाजं, धाः बाजं, ग्वारा, नाय्खिं आदि थन थानाः नं क्यंगु खः। बाजंया परम्पराकथं द्यःल्हानाः तिनि प्रा. शाक्यया ज्यापौ शुरु जूगु खःसा अन्त्यय् नं द्यःल्हानाः हे ज्यापौ ब्वनेज्या दिकूगु खः।
प्रा. शाक्यया ज्यापौ बारे समीक्षा यासें संस्कृतिविद् तेजेश्वरबाबु 'ग्वंगः' जुं ज्यापती आपालं बांबांलाःगु खँ दु धासें शाक्यं नाय्तय्सं थाइगु बाजं जूगुलिं नाय्खिं बाजं धाइ धाःसां थ्व वास्तवय् दकलय् न्हापां थाइगु वा बाजंया नायः जूगुलिं नाय्खिं बाजं धायेगु याःगु खः धयादिल। वय्कलं नेवाःतय्गु फुक्क बाजागाजायात पाठ्यक्रमय् दुथ्याकेमाःगु प्रस्ताव नं अन तयादीगु खः ।
ज्याझ्वलय् न्ह्यब्वःगु ज्यापौयात कयाः उपस्थित व्यक्तित्वपिंसं नं थःथःगु जिज्ञासा प्वंकुसें न्ह्यसः तयादीगु खःसा प्रस्तुतकर्ता प्रा. सुवर्ण शाक्यं उकिया लिसः बियादीगु खः। ज्याझ्वलय् उपस्थित मध्ये विकासनाथ योगीं गुंला बाजंयात छगू जक ला (गुंला) य् जक थायेगु मयासे हरेक अवसरय् थायेगु याःसा थ्व बाजंया भविष्य सुनिश्चित जुइगु खः ला धइगु जिज्ञासा तयादीगु खः ।
मूपाहां किरण मानन्धरं संगीत दुगु थासय् हे लालित्य दइ धासें संगीत प्रतिष्ठानं ग्वसाः ग्वःगु उगु ज्याझ्वः नालेबहःगु ज्याझ्वः खः धयादिल। वय्कलं नेपाः थेंजाःगु संगीत व कलां सम्पन्न देशय् थुज्वःगु ज्याझ्वःया अभाव जुयाच्वंगु धासें संगीत प्रतिष्ठानं संगीत व कलाया संरक्षणया निंतिं अझ ग्यसुग्यंगु पलाः न्ह्याकेमाःगु विचाः प्वंकादिल ।
ज्याझ्वलय् प्रतिष्ठानया उपकुलपति प्रचण्ड मल्लं लसकुस यानादीगु खःसा ज्याझ्वः संयोजक प्राज्ञ रामकृष्ण दुवालं सुभाय् बियादीगु खः। ज्याझ्वलय् नेपाल प्रज्ञा प्रतिष्ठानया कुलपति वैरागी काइँला व नेपालभाषा एकेडेमीया चान्सलर सत्यमोहन जोशीपिंत नं पाहां कथं ब्वनातःगु खः ।
