सुडान प्रकरणय् प्रहरीतयत् कारवाही

शान्ति स्थापनाया लागिं सुडान वंगु नेपाःया प्रहरी टोलीया लागिं माःगु बन्दोवस्तीया सामान न्यायेगु ज्याय् जूगु घोटालायात कयाः आः नकतिनि अख्तियार दुरुपयोग अनुसन्धान आयोगं पुलांपिं व वहालवाला यानाः ३४ म्ह प्रहरी अधिकारीतय् विरुद्ध मुद्दा दायर याःगु दु। भ्रष्टाचार मुद्दाय् छक्वलं थुलिमछि प्रहरी अधिकृततय्त मुद्दा तयाः कारवाही याःगु थ्व नेपाः जक मखु विश्वया हे न्हापांगु घटना जुइमाः। भ्रष्टाचार निवारणया ख्यलय् ल्ह्वंगु थ्व छगू तःधंगु व च्वछायेबहः पलाः खः ।

खतुं थ्व प्रकरणय् आः दायर याःगु मुद्दा प्रयाप्त मजू धइगु खँ न्ह्यःने वयाच्वंगु दु। छाय्धाःसां थपाय्धंगु काण्ड छुं नं कथंया राजनीतिक संरक्षण मदयेक प्रहरी सेवाय् वइपिं प्रहरी अधिकृततय्सं जक याये फइगु सम्भावना मदु। प्रहरी निकाय स्वयां नं च्वय्या व्यक्तित गृहमन्त्री, गृह सचिवया नं थुकी ल्हाः दयेमाःगु जूगुलिं उमित छाय् कारवाही मयात धइगु न्ह्यसः पिहां वयाच्वंगु दु। थ्व प्रकरणयात कयाः सुडानया डार्फुर धाःगु थासय् हे वनाः स्थलगत अध्ययन याना वःगु संसदया राज्य व्यवस्था समितिया पुचलं नं थुकी प्रहरी अधिकारी जक मखु मन्त्री व सचिवया समेत ल्हाः दयेमाः धकाः अबलय् हे धाःगु खः। तर अख्तियारं उमित धाःसा छुट बिउगु कारणं थ्व मुद्दा पूर्वाग्रही जूगु टिप्पणी थन याना हःगु दु। तर थ्व ज्या पूर्ण रुपं प्रहरीं याइगु जूगु कारणं अख्तियारया धाथेंया दुरुपयोग याःपिं प्रहरी हे जक खः। मन्त्रीं धाल धायेवं तुं न्ह्यागु अनैतिक ज्या नं याये मजिउ धइगु शिक्षा थ्व मुद्दा प्रक्रियां बिउगु दु। कन्हय्या लागिं थ्व छगू तःधंगु ज्ञान जुइ ।

More Stories Like this