मुद्दा त्याका बीम्ह सिथि द्यः

न्ह्यागुं तःधंगु वा भिंगु ज्या याःसां दकलय् न्हापां गणेद्यः पुज्यायेगु चलन दु। तर नेवाःतय् धाःसा गणेद्यः स्वयां नं न्हापां छेँया पिखालखुइ निं कुमार पुज्यायेमाः। कुमारयात गणेद्यःया दाजु धाइ। अथे नं कुमारया महिमा सिउपिं धाःसा म्हो जक दु। कुमारयात सिथि द्यः नं धायेगु याः। अथे नं थ्व द्यःया पूरा नां धाःसा सिद्धि कुमार खः। ह्याउँगु वर्णयाम्ह थ्व द्यवं म्हय्खा गयाच्वंगु छगू मूर्ति येँया न्हूघः त्वालय् दु। न्यना कथं कुमारया मूर्ति नेपालय् थ्व हे छगू जक खः। अय्नं थौंकन्हय् धाःसा येँया मचलि व मनमैजुइ नं न्हूम्ह द्यः दयेकाः पलिस्था याःगु दु ।

दँय्दसं सिथि नखःयां कन्हय्कुन्हु सिथि द्यःया जात्रा यायेमाः। थ्व द्यःयात खतय् तयाः कुमारी चाःहिलीगु लागाय् चाःहीकाः याइगु खः। २०४६ साल तक नं थ्व जात्रा न्ह्यानाच्वंगु खःसां थौंकन्हय् धाःसा दिनाच्वंगु दु। उगु लागाया पुलांम्ह वडाध्यक्ष जुजुकाजी तण्डुकारं कनादीकथं द्यःखः तसकं झ्यातुगु, आयस्ता मगाःगु आदि कारणं यानाः जात्रा बन्द जुयाच्वंगु खः ।

नखः प्यन्हु न्ह्यः तृतीया कुन्हु सिथिद्यःया न्हवं याइ। थसिं वइपिं निम्ह नेमकुलतय्सं द्यःया जवय् व खवय् च्वनाः टेकु दोभानं हयातःगु लखं लुकाः न्हवं याइगु खः। लखं लुइबलय् जवय् च्वंम्हं लः लुइगु न्हापा लात धाःसा थःने न्हापां सिनाज्या न्ह्याइ अले देपापाखे च्वंम्हं न्हापां लः लुल धाःसा क्वःने न्हापां सिनाज्या न्ह्याइ धयागु धापू दु ।

गुकुन्हु द्यःया जात्रा जुइ वकुन्हु हे बलम्बुं छगू पुजा वयाः द्यःयात छाना थकीगु चलन दु। थौंकन्हय् सिथिद्यःया जात्रा मयायेधुंकूसां बलम्बुं थ्व पुजा वयेगु चलन धाःसा कायम हे जुयाच्वंगु दनि। म्हिगः नं न्हूघलय् थ्व पुजा वःगु खः। थुगु पुजाय् विशेष यानाः चौमरि, बीबःता नापं थीथी कथंया वः व चतांमरि तया हइ। अले द्यःयात चिपं थीकेगु कथं पुजा यानाः लिहां वनी। बलम्पुया सकलें सर्वसाधारण मनूतय्सं छता छता ज्वलं तयाः थ्व पुजा छ्वया हइगु खः। बलम्बुया थ्व पुजा मवःतले सिथि द्यःया नित्य पुजा तकं याइ मखु। सिथि द्यः वास्तवय् बलम्बुइ च्वंम्ह द्यः धाइ। छक्वः बलम्बुइ सिथि द्यः तन धकाः वया मांम्ह माःवःबलय् येँया न्हूघलय् सिद्ध जुयाच्वंगु खनाः लिहां वनाछ्वःगु व दँय् छक्वः थथे चखःमुली नसा व पुजा ज्वलं ज्वनाः नापलाः वइगु खः धइगु लोकोक्ति दु ।

सिथिद्यःया स्वापू सिनाज्यालिसे दुसां थ्व द्यःया विशेषता धाःसा मेमेगु नं आपालं दुगु जुयाच्वन। सुं मनू ताः ई तक म्हं मफयाच्वन, तच्वः जुयाच्वन वा असाध्य जुल धाःसा सिथि द्यःयाथाय् द्यइके वनीगु चलन दु। सछि व च्यापु न्यातु ल्हानागु इताः वा देवा हाम्वः चिकनय् बुलाः आइतवाः कुन्हु थ्व द्यःयाथाय् मत च्याकेगु चलन दु। यदि मत बांलाक च्यात धाःसा विरामी जूम्ह लनी, मत बांलाक मच्यात धाःसा ल्वगि मनू जुइ मखु धइगु जनविश्वास दु।
न्हापा न्हापा मनूत तीर्थयात्रा वनेगु, तापाक्क बनेज्या वनेगु चलन दु। उगु इलय् मोटर धइगु मदु। उगु ज्याया निंतिं प्यला, खुला वा दँ�दँ नं बी। थथे तापालय् वनाच्वंपिं मनूत इलय् लिहां मवल धाःसा लिहां वइ लाकि वइ मखुत धकाः सीकेत नं थ्व द्यःयाथाय् मत च्याकेगु याइ ।

आःयाम्ह पाःलाः बिष्णुलाल श्रेष्ठया अजि कृष्णकुमारी श्रेष्ठ दुबलय् वय्कलं मत च्याःगु स्वयाः हे ज्या जुइ वा जुइ मखु धकाः बांलाक धायेफु। वय्कः मदुसेंलि अन थज्याःगु ज्याया लागिं मत च्याकः वइपिं नं म्हो जुया वन। थौंकन्हय्यापिं मनूतय्सं थज्याःगु खँय् पत्याः मयाःगु जुयाः थःपिंसं नं उकी चिउताः मतयागु खँ पाःलाः श्रेष्ठं कनादी। न्हापा न्हापा गुलिखे द्यःमां व गुरुजुपिंसं नं थःथाय् क्यं वइपिंत सिथिद्यःयाथाय् मत च्याका वा धकाः छ्वया हयेगु यानाच्वंगु खः। थौंकन्हय् न्हापा थें ग्वाःग्वाः मनूत मवःसां अतिकं विश्वास दुपिं मनूत धाःसा वयां तुं च्वंगु खनेदु ।

थुगुसी जक हे मुद्दां त्याःपिं धकाः वंगु दछिया दुने ७ म्ह मनूत द्यइके वःगु खँ सीदुगु दु। लसतां द्यइके वइपिंसं सछि व च्यापा वः छुनाः उकिया माः (माला) हनाः द्यःयात क्वखायेकेगु, वसः व मेमेगु ज्वलं नं छानाः पूजा याइगु चलन दु। निदँ न्ह्यः अमेरिकाय् च्वंम्ह छम्ह मनूयात म्हगसय् सिथिद्यःयात वहःयागु करुवां लः त्वंका बिउ धकाः क्यं वल धासें वया मांबौपिंसं वहःया करुवां लः त्वंकः वःगु खँ नं द्यः पाःलाःपिंसं कनादीगु दु ।

More Stories Like this