मैत्रय बुद्ध झी दथुइ हे दी - ३

बिनोद साय्मि (आल)
थीथी धर्मय् मैत्रय:
द्वलंद्वः दँ न्ह्यः हे थीथी धर्मय् थुगु इलय् छम्ह तसकं तःधंम्ह महात्मा वयाः शिक्षा बिउ वइ धकाः च्वया/कना तःगु दु। उम्ह तःधंम्ह महात्मायाके संसारय् दुपिं दक्व जुजुपिनिगु शक्ति स्वयां नं आपाः शक्ति दइ धइगु भबिष्यबाणी यानातःगु दु । उम्ह तःधंम्ह महात्मां बीगु शिक्षां थुगु हलिमय् मेगु द्वलंद्वः दँ तक शान्ति न्यनी धइगु नं भविष्यवाणी यानातःगु दु। थुपिं दक्व धर्मतय्सं वइ वइ धयातःम्ह उम्ह तःधंम्ह महात्माया नां थीथी धर्मय् थीथी हे दुसां दक्व धर्मतय्सं संकेत यानाच्वंम्ह धाःसा गुरु "मैत्रय" खः। क्रिश्चियनतय्सं वय्कःयात जेसस लिहां वइगु धकाः पियाच्वंगु दु, मुस्लिमतय्सं ईमाम महदि नामं पियाच्वंगु, हिन्दूतय्सं कल्कि अवतार वा कृष्णया नामं पियाच्वंगु, दुसा यहुदीतय्सं मसाया नामं पियाच्वंगु, बौद्धतय्सं न्याम्हम्ह बुद्ध मैत्रय वइ धकाः पियाच्वंग दु। मैत्रय नां धाःसा बौद्धतय्सं धयाच्वं थें "मैत्रय" खः। गुलिं बौद्धतय्सं धाइ मैत्रय् ३५ कोति दँ लिपा तिति वइ। २६०० दँ न्ह्यः शाक्यमुनि भगबान बुद्धं छगू सुत्रय् "कलियुग क्वचाये धुंकाः बुद्ध थें हे जाःम्ह छम्ह तसकं तःधंम्ह महात्मा गुरु वयाः शिक्षा बी तिनि, उम्ह महात्माया नां मैत्रय खः" धयादीगु दु। मैत्रय हलिमय् गुगुं न्हूगु धर्म स्यनेत बाय् गुगुं धर्मय् बः बीत वःगु मखु। मैत्रय गुगुं नं कथं धार्मिक गुरु मखु। अथेहे वय्कः थःगु लिउलिउ जुइपिं साधकत आपाः खाकेत वःगु नं मखु। मनूत न्ह्यागु धर्म नालाच्वंसां बाय् गुगुं नं धर्म नाला मच्वंपिंसां उमित छम्ह लँ क्यनीम्ह गुरु जुयाः मैत्रय मनूया सेवा यायेत वःगु खः। मैत्रयं धयादी "मनूतय्सं थःथःगु धर्म, संसार, संस्कृति दुने च्वनाः थःगु बिकास याना वनेमा, जि थन शान्ति खयेकेत, न्याय चूलाकेत, मतिना न्यंकेत व मनू जन्म जूपिंत मनू जुयाः जीवन हनेगु अःपुगु कला स्यनेत वयाम्ह खः ।"

महात्माया पुचः:
मैत्रय, न्हूगु ई कथंया शिक्षा बियाः मानव सभ्यता बिकाश यानाः न्हूगु लुँ युगय् मनूतय्त थ्यंकेगु ताः ज्वनाः याकःचा मखु महात्मातय्गु पुचःया लिसें उगु पुचःया नायः जुयाः कुहां झाःगु दु। न्हूगु युगया निंतिं वःपिं सकलें महात्मापिनि दथुइ नं मैत्रय् गुरु खः। न्हापालिपा थें छगू युगय् छम्ह महात्मा, गथेकि छगू इलय् छगू थासय् जेसस छम्ह जक, कृष्ण छम्ह जक, राम छम्ह जक, शाक्यमुनि बुद्ध छम्ह जक वये थें आः नं मैत्रय छम्ह जक वःगु धाःसा मखु। थुगुसी महात्मापिनिगु पुचः हे न्हूगु युगया जन्म बीत वःगु दु। थुकथं थुगु इलं मनू इतिहासय् गबलें गबलें मजू मन्यनानि कथं बिस्कंगु महत्वपूर्ण भाला क्वबिउगु दु ।

महात्मापिं एल मोर्या, कुथुमि, सेन्ट जर्म्येनपिं थुगु हलिमय् आपालं न्ह्यवंनिसें कुहां झायाच्वंगु खः। सेन्ट जर्म्येन सन् १६८४ य्, कुथुमि सन् १८८९ य्, एल मोर्या सन् १८९८ य् थन कुहां झाःगु खः। थ्व झ्वलय् सन् १९७५ स न्याम्ह महात्मापिं कुहां वयाः पूर्व निसें पश्चिम तक पृथ्वीया थौं कन्हय्या मू न्यागू आध्यात्मिक थासय् च्वन। वयां लिपा हाकनं निम्ह महात्मा कुहां वल। वय्कःपिं थौंकन्हय् छम्ह छम्ह यानाः अमेरिकाया न्यूयोर्क, बेलायतया लण्डन, स्वीजरल्याण्डया जेनेभा, भारतया दार्जलिङ्ग, जापानया टोक्यो, रुसया मस्को व ईटलीया रोमय् च्वनाच्वंगु दु। सन् २००८ तक १४ म्ह महात्मा कुहां वयेधुंकूगु दु। अन्तिमय् वय्कःपिं ४० तक खाइ तिनि ।

मैत्रयया न्हापांगु पलाः:
मैत्रयया दकलय् न्हापांगु पलाः धइगु हलिमय् शान्ति खयेकेत मनूतय्त प्रेरणा बियाः बिश्व शान्तिया जग स्वनेगु खः। मैत्रयं धयादी, विश्व शान्तिया निंतिं दकलय् न्हापां माःगु सिद्धान्त धइगु संसारय् दुगु दक्वं श्रोत साधनया मंकाः छ्यला खः। संसारय् दुगु दक्वं साधन श्रोत झी सकसियां खः धइगु मंकाः भाव ब्वलनेवं विश्वय् विकसित व बिकासोन्मुख देय्या विभेद माथं वंकेत तिबः जुइ। संसारया साधन श्रोतय् मंकाः भावं हे मनूतय् थवंथः दथुइ क्वातुगु भलसाया वातावरण ब्वलंकी व अनंलि संसारय् दयाच्वंगु समस्या ज्यंकेत लुखा चालावनी। मैत्रेयया उद्देश्य गरिब मुलुकय् नये मखनाः द्यांलानाच्वंपिनिगु निंतिं ग्वाहालि यायेगु खः। वयां लिपा छुं दँ तक समाजया पुनर्संरचना यायेगु व न्हूगु सभ्यता बिकास यायेत जग स्वनेगु जुइ। थुकथं मैत्रयया न्हापांगु पलाः धइगु ल्ह्नेज्या खः ।

मैत्रयया मू तिबः:
- हलिमय् शान्ति खयेकेगु।
- संसार दुगु सकतां श्रोत साधनया मंकाः छ्यलाया सिद्धान्त न्ह्यज्याकेगु।
- मनूतय्के ग्याःचिकु व दोष मदयेकाः मनूया नुगः व बिचाः शुद्ध यायेगु।
- पाय्छिगु शिक्षा, जीवनया नियम सिद्धान्त व मतिना कथं बीगु।
- रहस्यतय्गु म्हसीका बीगु।
- थाय्बाय् यचुपिचु यायेगु।
- मनूत छथासं मेथाय् वयेवने मजीक दयाच्वंगु पंगः मदयेका यंकेगु ।

मैत्रयया न्हापांगु सार्वजनिक:
मेरि सिनाइदा अकत्सा केन्याया छम्ह नांजाःम्ह ल्वय् लायेकीम्ह द्यःमां खः। वय्कःयाके दुगु दैविक शक्तिं वयकलं ल्वय् लायेकाः मनूतय्गु सेवा याना वयाच्वंगु दु। वय्कःया चर्चया सकलें दुजःतय्सं तयूगु वसः, तपुलि व उकी आकाश रंगया बाला दुगु लं फी। वय्कःया कथं चर्चय् थुगु उनया वसः छ्यलेत द्यवं हे साहुति बिया हःगु खः। थुगु उनया अर्थ द्यःया मस्त व छगू हे धर्म, आस्था खः। मेरि सिनाइदा अकत्सायाके दुगु करुणा व मतिनां यानाः वय्कःयात हनाबना तयाः सकसिनं "मां" धाइ। वालय् स्वक्वः वय्कलं कवाङवरि चर्चय् ल्वय् लंकेगु ज्याझ्वः याइ ।

छन्हु, सन् १९८८ जुन ११ सनिवाः कुन्हु न्हापा लिपा थें केन्याया नैरोबीइ वय्कःया चर्चय् (मुस्लिमतय्गु गां बेठ्लहम, कवाङवर, नैरोबी, केन्या) प्रार्थना व उपचारया लागिं अथेहे ६००० म्ह ति मनूत छगू खुल्ला थासय् मनूत मुनाच्वंगु खः। मेरि सिनाइदा अकत्सां अन ल्वचं कःपिं, मिखां मखंपिं, खुत्यांपिं, होस तनाच्वंपिंनिगु भिं उसाँय्या निंतिं आध्यात्मिक प्रार्थना यानाच्वंगु। उगु इलय् मेरि सिनाइदां धयादिल कि "द्यवं जिनाप खँल्हाबल्हा ब्याकादीगु दु। पलख लँनाच्वनादिसँ। तसकं हनेबहम्ह पाहां छगू हसना ज्वनाः झायेत्यंगु दु।" न्यागू मिनेट लिपा मेरि सिनाइदा अकत्सां न्ह्यथंम्ह पाहां आकाझाकां मनूतय् हुलमुलया दथुइ खने दयेकः वल। म्येँ हाला आध्यात्मिक प्रार्थना यानाच्वंपिं सकसितं म्येँ हालेगु दिकेत इनाप यानादिल। वय्कः फसं पिलू वःम्ह पाहां बुलुहुँ न्हूगु चर्चपाखे न्यासि वन। लिसेलिसें मेरि नं। आश्चर्य, वय्कः न्हूम्ह पाहांया छ्यनंनिसें पालि तक व म्ह छम्हं जः बाः वयाच्वंगु खनेदु ।

(कथहं)

More Stories Like this

जातीय संघीयताया खँय् नेमकिपा
प्राडो, पाजेरो ब्वाकेगु ख्यः मखु
राष्ट्रपति प्रणाली बारे विवाद
नेवाःतय्त जागृत याइगु 'नेपाःमिया नुगः सः'
खँ स्वनिगःया