पूर्व गृह मन्त्रीयात छाय् त्वःतल ?

अख्तियार अनुसन्धान आयोगं राष्ट्रसंघया डार्फर मिशन अर्थात सुडान काण्डय् भ्रष्टाचार याःगु द्वपंय् स्वम्ह पूर्व आइजिपी सहित स्वीप्यम्ह प्रहरी कर्मचारी व २ म्ह ठेकेदारया विरुद्ध म्हीग विशेष अदालतय् मुद्दा दायर याःगु दु । थुकी राजनीतिक दलया छम्हहे मनू त लाःगु मदु । थुकिं अख्तियारयात सरकारी वा दलीय राजनीतिं प्रभावित यानाच्वंगु प्रष्ट याःगु दु । भ्रष्टाचार व अपराध सुयागुपाखें नं जुइमज्यु । अले जुहे जुल धाःसा नं राजनीतिक दलतय्सं उकियात त्वपुइ वा संरक्षण वीगु ज्या पूर्णत त्वःते माः । तर व्यवहारय् थ्व धायेगु जक जुइ छुंनं ज्याखँय् तत्कालिन गृहमन्त्री व गृह सचिवया नं उगु काण्डय् ल्हाः दु । नैतिकरुपं जिम्मेवारी जुइ । प्रहरी प्रशासन पाखें जूगु थुगु भ्रष्टाचार काण्डय् प्रहरी प्रशासनतय्त जक दोषी खंकाः मन्त्रालयया सचिव व गृहमन्त्री यात नां नं मकासे केवल ३४ म्ह अधिकारी व निम्ह ठेकेदारतय्त वाहेक मेपिन्त उन्मुक्ति वीत स्वःगु दु । थथ्य छाय् जुल ? सम्वन्धित थासं थुकियात स्पष्ट यायेमाःगु दु ।

अख्तियारं पूर्व आइजिपिं ओम विक्रम राणा, हेमवहादुर गुरुङ्ग व रमेश चन्द ठकुरीयात मूख्य अभियुक्त धयाः थुपिं स्वयाः च्वय् च्वंपिं पूर्व गृहमन्त्री व नेपाली कांग्रेसया महामन्त्री कृष्णप्रसाद सिटौला व गृह सचिव उमेश मैनालीयात दायर याःगु मुद्दाय् गनं नां तक्क नं कयातःगु मदु । अख्तियारया थुगु पहयात आम नेपाःमि जनता न्ह्यसः थनाच्वंगु दु । राजनीतिकरुपं प्रभाव त्वःते फुपिन्त थुगुकथं भ्रष्टाचार काण्डं उन्मुक्ति वियां वनेगु खःसा नेपालं भ्रष्टाचारया विरोधयायेगुया छंहे औचित्यता दैमखु । प्रहरी कर्मचारीत जक मदु, उगु काण्डय् ल्हाः दुपिं सकसितं न्यायालय् थनेमाः । राजनीतिकरुपं प्रभावित याइपिन्त छुट वीगु ज्या यानाः छख्य सरकार वदनाम जुइगु ज्या खःसा मेख्य भ्रष्टाचारीतय्त राजनीतिक संरक्षण वियाः पुरा राजनीतियातहे नवयेकाःवीगु ज्या जुइफु । थुगु खँयात ध्यानय् तयाः सुंनं व्यक्तियात राजनीतिक संरक्षण वीमज्यू । भ्रष्टाचारयात निर्मूल यायेमाल धकाः कानून दयेकेत न्ह्यज्याइपिं राजनीतिक दलतय्संहे थुगु कथं अपराधीतय्त संरक्षणवीगु ज्या जुल धाःसा देशय् कानून व्यवस्थाया हालत छु जुइ ? अपराधयात संरक्षण व्यू व्युं लिपा वनाः पार्टी पार्टीइहे अपराधीतय्गु पुचलय् हिलेत वेरमदु । कांग्रेसया महामन्त्री जूगुलिं आः थत्थें ल्हाः मतयेगु व थुकिया हे कारणं वर्तमान सरकारं थःगु स्थिति क्वातुइकेत स्वःगु खःसा नं थ्व थें निन्दनीय खँ मेगु जुइमखु ।

More Stories Like this