संचार मन्त्रालयपाखें प्यम्ह पत्रकारतय्त सम्मान

येँ (झीगु स्वनिगः)

सूचना तथा संचार मन्त्रालयया ज्याकुथिइ म्हिगः बुधवाः छगू ज्याझ्वःया दथुइ प्यम्ह पत्रकारतय्त थीथी कथंया पुरस्कार लःल्हाःगु दु । सूचना तथा संचार मन्त्री अग्नी सापकोटां वरिष्ठ पत्रकार तारा न्यौपानेयात राष्ट्रिय पत्रकारीता पुरस्कार, बरिष्ठ पत्रकारपिं शक्ति लम्साल, माधव शर्मा व पन्नालाल गुप्तायात बरिष्ठ पत्रकार सम्मान पुरस्कार लःल्हायेगु ज्या जूगु खः । वरिष्ठ पत्रकार न्यौपानेयात राष्ट्रिय पत्रकारीता पुरस्कार थुगुसी स्वक्वःखुसि लःल्हाःगु खः । थ्वसिबें न्ह्यः न्हापा संचार मन्त्रालयपाखें मदुम्ह बरिष्ठ पत्रकार कृष्णसेन इच्छुक व बरिष्ठ पत्रकार भैरव रिसालयात लःल्हाये धुंकूगु खः । म्हिगः उगु पुरस्कार कयादीम्ह बरिष्ठ पत्रकार तारा न्यौपाने वंगु २०३२ सालंनिसें निरन्तर रुपं प्रगतिशिल पत्रकारीता ख्यालय् ज्या यानाः वयाच्वनादीम्ह खः । थौंकन्हय् वय्कः महिमा वाःपतिइ सम्पादकया रुपय् ज्या यानाः वयाच्वनादीगु दु । उगु पुरस्कारया राशी २ लाख तका व हनापौ खःसा ज्याझ्वलय् दोसल्लां न्ययेकेगु ज्या नं जूगु खः ।

अथे हे बरिष्ठ पत्रकार सम्मान पुरस्कार कयादीपिं स्वम्ह हे पत्रकारपिं शक्ति लम्साल, माधव शर्मा व पन्नालाल गुप्तायात नं हनापौ नापं छम्हेसित २/२ लाख तका ध्यबा नं लःल्हाःगु खः । पत्रकार शक्ति लम्साल २००९ सालंनिसें निरन्तर रुपं प्रगतिशिल पत्रकार जुयाः ज्या यानाः वयाच्वनादीम्ह खःसा माधव शर्मा २०३६ सालंनिसें प्रगतिशिल पत्रकारीता यानाः वयाच्वनादीम्ह खः । उगु हे कथं पन्नालाल गुप्ता २०२८ सालंनिसें निरन्तर रुपं पत्रकारीता यानाः वयाच्वनादीम्ह खः । सूचना तथा संचार मन्त्रालयपाखें थुगुसी न्हापांखुसि बरिष्ठ पत्रकार सम्मान पुरस्कार लःल्हाःगु खः ।