निम्ह जक सभासद् दुगु जनता दल तज्यात

आः संविधानसभाय् ३० दल

येँ (झीगु स्वनिगः)

देय्या राजनीतिक तरलता नाप नापं संविधानसभाय् दुथ्याःगु राजनीतिक दलत लगातार रुपं तज्याना वयाच्वंगु झ्वलय् आः हाकनं निम्ह जक सभासद्त दुगु नेपाली जनता दल नं तज्याःगु दु । नेपाल जनता दल तज्याना आः संविधानसभाय् ३० गू दल थ्यंगु दु । म्हिगः बुधवाः जनता दल औपचारिक रुपं तज्याःगु खः । उगु पार्टीया सभासद् विश्वनाथ अग्रवालं पार्टी तछ्यानाः न्हूगु पार्टी संविधानसभाय् दर्ता यानादीगु दु । अग्रवालं म्हिगः सविधानसभाया नायः सुवासचन्द्र नेम्वाङयात नापलानाः पार्टी तज्याःगु औपचारिक पौ तकं लःल्हानाः सनाखत तकं याकादीगु दु । वय्कलं न्हूगु पार्टीया नां जनता दल युनाईटेड धकाः तयादीगु दु ।

पार्टीया नायः हरिचरण साह नं थीथी कथंया भ्रष्टाचार याःगु द्वपं अग्रवालं बियादीगु दु । वय्कलं साहया दबाव सह याये हे मफयाः थःम्हं बाध्य जुयाः पार्टी तछ्यायेमाःगु खः धयादीगु दु । वय्कलं नेपाली जनता दलया ४० म्ह केन्द्रीय दुजःत मध्ये १७ म्ह थःयाके दु धकाः दावी तकं यानादीगु दु । जनता दलया मेम्ह सभासद् गायत्री साह कुतनीतिक राहदानी दुरुपयोगया अभियोगय् निलम्वित जुयाच्वंगु अवस्थाय् दु । न्हूगु पार्टीया मान्यता कायेत संसद्या ४० प्रतिशत बाय् केन्द्रीय कमिटीया ४० प्रतिशत माःगु प्रावधान दु । अग्रवाल नायः जुयादीगु न्हूगु पार्टी जनता दल युनाइटेडया सह अध्यक्षय् नरेन्द्रनाथ देव, न्वकु किरणकुमार मगर, छ्याञ्जेय् रञ्जनराज श्रीवास्तव, दांभरीइ नरेश केशरी व प्रवक्ताय् कुमार पौडेल च्वनादीगु दु । लुमंकेबहःजू छुं दिं न्ह्यः जक मधेसी जनअधिकार फोरम तज्याना मधेसी जनअिधकार फोरम गणतान्त्रिक गठन जूगु खः ।