'जनसेनाया हे नेतृत्व जुइमाः'

येँ (झीगु स्वनिगः)

एकीकृत नेकपा -माओवादी)या लडाकूया कमाण्डरतय्सं सेना समायोजन लिपा न्हूगु फोर्सया नेतृत्व थःपिन्सं याये दयेमाः धकाः धयादीगु दु । म्हिगः बुधवाः माओवादीया नायः पुष्पकमल दाहाल प्रचण्डया निवास नयाँ बजारय् जूगु सहलह ज्याझ्वलय् जनसेनाया कमाण्डरतय्सं अथे धयादीगु खः । थ्यंमथ्यं ६ घण्टा तक जूगु सहलह ज्याझ्वलय् लडाकुया कमाण्डरतय्सं पार्टीं छुं निर्णय याइ उकियात स्वीकार यायेत थःपिं तयार धकाः धयादीगु दु । नेपाली सेनाया प्रस्ताव कथं नेपाली सेनाया मातहतय् महानिर्देशनालय गठन यायेगु प्रस्ताव पार्टीं स्वीकार याःगु अले व हे प्रस्ताव कथं महानिर्देशनालयया नेतृत्व जनसेनां हे याये दयेमाः धकाः उगु सहलह ज्याझ्वलय् बः बियादीगु खः । उगु ज्याझ्वलय् ब्वति कयादीम्ह माओवादीया छम्ह लडाकु कमाण्डरं धयादिल 'लडाकुया जक ब्यागलं कथंया फोर्स गठन जुइगु अवस्था मन्त, उकिं सेनाया मातहतय् महानिर्देशनालय गठन यायेगु प्रस्तावय् हे समायोजन यायेगु उपयुक्त जुइ ।'

थःपिनिगु सम्मानजनक समायोजन जुइमाःगु खँय् बहः बियादिसें लडाकुया कमाण्डरतय्सं जनसेना आःया अवस्थाय् छु दर्जाय् दु समायोजन लिपा नं व हे दर्जा दयेमाः धकाः माग यानादीगु खः । कम्ति नं १० हजार जनसेनात समायोजन यायेमाःगु सुझाव लडाकुया कमाण्डरतय्सं सुझाव बियादीगु खः । सहलहया झ्वलय् सेना समायोजनया मोडालिटी, तह नापं मेमेगु विषयसं नं पार्टीया नेतृत्व व लडाकु कमाण्डरतय् दथुइ सहलह जूगु खः । सहलहया झ्वलय् माओवादीया शीर्ष नेतात बहुमत व अल्पमत यानाः फरक मत तकं मदयेकूसे सर्वसहमति कथं न्ह्याः वनेमाःगु खँय् नं बहः बियादीगु खः । प्रचण्ड निवासय् जूगु उगु सहलह ज्याझ्वलय् माओवादीया केन्द्रीय पदाधिकारी, छुं छुं स्थायी समितिया दुजः, सैन्य कमाण्डरंनिसें २१ गू हे डिभिजनया कमाण्डरतय्सं ब्वति कयादीगु खः । सेना समायोजन विशेष समितिपाखे न्ह्याकाच्वंगु ज्याझ्वः नापं भदै १० दुने हाकनं वर्गिकरण यायेगु धकाः निर्णय याःगु, मेमेपिं दलतय्सं सेना समायोजनयात कयाः म्हिताच्वंगु भूमिका नापं थीथी पक्षयात कयाः नं अन सहलह जूगु खः ।