किरण पक्षं लडाकु लित मबिउ

येँ(सन्ध्या टाइम्स)/एकीकृत माओवादी दुने निगू लाईन संघर्षया लिच्वः आः सेना समायोजनया ज्याय् तकं लाइगु संकेत खने दयावःगु दु ।

दोहोरो सुरक्षा अन्त्य यायेगु धकाः पार्टीं याःगु निर्णय विरुद्ध नोट अफ डिसेन्ट च्वयादीम्ह बरिष्ठ उपाध्यक्ष मोहन बैद्य (किरण) पक्षया नेतातय्सं थःपिनि सुरक्षाया निंतिं बियातःपिं लडाकु व ल्वाभः लित बीगु ज्यायात अस्वीकार यासें थःपिनि लडाकु सुरक्षाकर्मीत आः तकं थःथाय् तुं तयातःगु दनि ।

सूत्रं धाः कथं किरण पक्षया नेतातय्सं 'आःयात शिविर वनेमाःगु आवश्यकता मदुनि, हथाय् चायेम्वाः' धाःगुलिं लडाकुत शिविरय् मवँसे च्वनाच्वंगु खः। उपाध्यक्ष बैद्य नापं वय्कःया पक्षधर न्याम्ह नेतातय्सं थःपिनि सुरक्षाय् खटे जुयाच्वंपिं लडाकुत लित मछ्वःगु खः। उकी बैद्य पक्षधर न्याम्ह नेतातय् सुरक्षाय् खटे जुयाच्वंपिं गुम्ह लडाकु व खुगू हतियार शिविरय् छ्वःगु मदुनि। बैद्यया सुरक्षाय् खटे जुयाच्वंपिं स्वम्ह लडाकु व निगू हतियार, सचिव सीपी गजुरेलया निम्ह लडाकू व निगू हतियार, नेत्र विक्रम चन्द विप्लबया निम्ह लडाकु व छगू हतियार, देव गुरुङया छम्ह लडाकू व छगू हतियार नापं हरिभक्त कँडेलया छम्ह लडाकू व छगू हतियार आः तक लित मछ्वसे तयातःगु दनि ।

माओवादी अध्यक्ष प्रचण्ड नापं मेमेपिं नेतातय्गु सुरक्षाय् खटे जुयाच्वंपिं ६६ म्ह लडाकु व ल्वाभः धाःसा चितवनया शक्तिखोर शिविरय् थ्यने धुंकूगु दु। शक्तिखोरय् मेपिं नं लिहां वइतिनि धकाः पियाच्वंगु दु ।

लडाकु कमान्डरतलिसे प्रचण्डया परामर्श
माओवादी अध्यक्ष प्रचण्डं थौं सुथय् येँय् दुपिं लडाकुया कमान्डरतय्त थःगु छेँय् सःताः सहलह ब्याकादीगु दु।
ब्रिगेड कमाण्डर तकया लडाकुतय्त सःताः सेना समायोजन नापं बैद्य पक्षं आः तक नं लडाकुत लित मछ्वसे थःथाय् तुं तयातःगु व ल्वाभः तकं लित मबिउनिगु बारे वय्कलं सहलह ब्याकादीगु खँ धाःगु दु। सेना समायोजन विशेष समितिपाखें वइगु भदौ १० गते तकया दुने सेना समायोजन यायेगु नापं ल्वाभः तकं लःल्हायेगु धकाः निर्णय जूगु विषययात कयाः अध्यक्ष प्रचण्डं थःगु पार्टीया लडाकुतलिसे सहलह ब्याकादीगु खः। परामर्शया झ्वलय् प्रचण्डं हथासं समायोजन यायेगु नामय् लडाकुतय्गु अपमान यायेगु ज्या गुगु हालतय् नं जुइ मखु धकाः लडाकु कमान्डरतय्त आश्वासन नं बियादीगु खँ सूत्रं धाःगु दु ।

पार्टी-सेना वार्ता
थौं हे माओवादीया केन्द्रीय पदाधिकारीत व सेनाया कमाण्डर नन्द किशोर पुन (पासाङ) दथुइ नं बैठक च्वंगु दु। उगु बैठकय् लडाकुया मेपिं डिभिजन कमाण्डरत नं दुथ्याः। पार्टी अध्यक्ष, उपाध्यक्षपिं, महासचिव व सचिव लिसें सेनाया कमाण्डरतय् दथुइ जूगु उगु बैठक समायोजन व नेतातय् सुरक्षाकर्मी लित यंकेगु सवालयय् केन्द्रित जुइगु अनुमान दु ।