भिक्षु कुमारकाश्यपया स्वास्थ्य सुधार
येँ (सन्ध्या टाइम्स)/उसाँय् मदयाः अस्पताल भर्ना जुयाबिज्याःम्ह भिक्षु कुमार काश्यप महास्थविरया स्वास्थ्यय् छुं भचा सुधार जूगु दु। वंगु जेठ ६ थनया मोडल अस्पतालय् वसपोलयात भर्ना याःगु खःसा आः जलस्येँ डायलासिस यानाःलि वसपोलया स्वास्थ्यय् सुधार जुया वःगु खँ सुसाः कुसाः याना च्वनाबिज्याःम्ह भिक्षु कोण्डन्यं 'सन्ध्या टाइम्स'यात कनाबिज्यात ।
थौं नापं यानाः वसपोलया खुक्वः डायलासिस जुइधुंकूगु दुसा आः वालय् निक्वः नियमित डायलासिस यायेमाःगु खँ धाःगु दु। थगुने पुसं नं वसपोलयात स्वला तक अस्पतालय् तयाः उपचार यानाः यंकूगु खः ।
२००१ सालय् जुद्ध शम्सेरं देशं पित्युंपिं थेरवादी भिक्षुत मध्ये आःतक जीवित दनिम्ह वसपोल छम्ह हे जक खः। वसपोल भिक्षु महासंघया पुलांम्ह नायः व नेपाल लिपि गुथिया संरक्षक नं खः ।
