निलम्बनं यानाः प्रहरी अधिकृतत हे खाली
येँ (सन्ध्या टाइम्स)/सुडानय् खटे जुयाच्वंपिं नेपाली शान्ति सेनाया पुचलय् वंपिं प्रहरीया लागिं न्याना काःगु सामान सम्बन्धी घोटालाय् छक्वलं २३ म्ह बहालवाला प्रहरी अधिकृततय्त मुद्दा चले यायेवं प्रहरीया नियमित ज्याखँ हे प्रभावित जुइगु जूगु दु। उगु काण्डय् ल्हाः दुपिं धकाः वहालवाला व पुलांपिं यानाः ३४ म्ह प्रहरी अधिकृततय्त अख्तियारं मुद्दा दायर याःगु खः ।
मुद्द लाःपिं २३ म्ह प्रहरी अधिकृतत स्वतः निलम्बनय् लाःगु दु। थुकिं यानाः प्रहरीया ज्याखँय् पंगः मवयेकेगु लागिं सरकारं उगु खालि जूगु पदय् मेपिं नियुक्ति यायेगु तयारी शुरु याःगु दु। खालि जूगु पदय् नियुक्तिया तयारी यायेत थौं सहलह जुइत्यंगु खँ नं धाःगु दु। आः मुद्दा लाःपिं प्रहरी अधिकृततय् मुद्दा गय् गथे जुइगु खः सीमदुगुलिं उमिगु थासय् न्हूपिं नियुक्ति यायेत्यंगु खः ।
थ्वहे झ्वलय् उगु काण्डय् ल्हाः दुपिं धकाः फुक्क हे प्रहरीतय्त जक कारवाही यानाः तत्कालिन मन्त्री व सचिवतय्त धाःसा छुं हे मयाःगु खँय् प्रहरीत असन्तुष्ट जूगु दु। उगु काण्डय् तत्कालिन गृहमन्त्री व गृह सचिवतय् नं ल्हाः दुगु खँ वयाच्वंगु दु। अख्तियारं धाःसा सामान न्यायेगु भ्वँतय् हस्ताक्षर दुपिंत जक कारवाही याये फइगु जूगुलिं थुकी प्रत्यक्ष ल्हाः दुपिं प्रहरी अधिकृततय्त जक मुद्दा तयागु खँ धाःगु दु ।
