एमाले स्थायी समितिया बैठक रिसोर्टय्
येँ (सन्ध्या टाइम्स)/सरकारया नेतृत्व यानाच्वंगु एमाले स्थायी समितिया बैठक पार्टीया ज्याकुथी मच्वँसे भुइजःसिया पार्क भिलेज रिसोर्टय् च्वंवंगु दु ।
पार्टीया आन्तरिक विवाद ज्यंकेगु नितिं धासें अथे एकान्तय् स्थायी समितिया बैठक च्वंवंगु खः। पार्टी दुने खने दुगु विवाद नापं नेतातय्गु जिम्मेवारी हेरफेर, प्रधानमन्त्रीया राजीनामा, न्यागू बुँदाया सहमति कार्यान्वयन, शान्ति प्रक्रिया पूवंकेगु नापं न्हूगु संविधान निर्माणया विषयय् सहलह यायेत एमाले बैठक रिसोर्टय् च्वंवंगु खः। बैठकय् सरकार संचालनया सवाल नापं कांग्रेसं राजनीतिक नियुक्तया विषययात कयाः प्रधानमन्त्री खनालयात बिउगु ख्याच्वःया बारे नं सहलह जुइ ।
स्थायी समितिया बैठकया बारे संचारकर्मीतय्त तकं मधासे सुटुक्क रिसोर्टय् नेतात वंगु खः। उगु बैठकं एमालेया केन्द्रीय कमिटी बैठकया लागिं एजेण्डा नं तयार याइ धकाः धाःगु दु ।
