जनगणनाय् सम्बद्ध जातिया हे गणक

न्ह्यःने वयाच्वंगु राष्ट्रिय जनगणना थ्व इलय् सकल नेपाःमितय् दथुइ चर्चाया विषय जुयाच्वंगु दु। देशय् सकलें जाति भाषाया जनतां थःगु पहिचान ब्वयेगु लागिं संघर्ष यानाच्वंगु व देय्या मूल कानून संविधान तकं उकथं हे च्वयेमाः धकाः माग यानाच्वंगु इलय् कायेत्यंगु जनगणना जुयाः नं थुखेपाखे सकस्यां ध्यान वंगु खः ।

थ्वहे झ्वलय् थीथी जाति भाषाया बाहुल्यता दुगु थासय् वहे जाति भाषाया गणकत छ्वया हयेमाः धइगु सः नं थ्व इलय् देय्न्यंकं थ्वयाच्वंगु दु। सम्बद्ध लागाया मनूतय् भाय् मसिउपिं गणकत वइबलय् उमिसं पाय्छि कथं तथ्यांक काये मसइगु वा गलत तथ्यांक च्वया यंके फइगु सम्भावना दुगुलिं सम्बद्ध जातिया मनूतय्सं थःगु जातिया मनूतय्त गणक दयेकाः छ्वया हयेत आग्रह याना हःगु खः। थ्व �वलय् यलय् नेवाःतय् बाहुल्यता दुगु थासय् नेवाः गणकत हे छ्वया हयेमाः धकाः माग जूगु व उकियात केन्द्रीय तथ्यांक विभागं नं स्वीकार याःगु खँ पिहां वःगु दु। थ्व लसकुस यायेबहःगु खँ खः। तर सम्बद्ध जातिया मनूतय्सं माग याः थें तथ्यांक विभागं अथे मनू छ्वयेगु अवस्था नं मदयाच्वंगु जुइफु। छुं ई न्ह्यः तिनि येँय् नेवाःत गणक जुइपिं हे मदयाच्वन धइगु खँ नं पिहां वःगु खः। नेवाःत थें हे मेमेगु जातिया सवालय् नं अथे हे जुयाच्वंगु जुइफु। थुकी बरु सम्बद्ध जातिया खलः पुचःतय्सं हे छुं कथं पहल याना बीमाःगु नं आवश्यकता खनेदु। अथे जुल धाःसा विभागयात नं ज्या यायेत अःपुइ व तथ्यांक नं सही पिकायेत ग्वाहालि जुइ। सही तथ्यांक पिकायेगु विभागया लागिं स्वयां नं झीगु लागिं महत्वपूर्ण जूगु खँ ल्वःमंके मजिउ ।

More Stories Like this