मैत्रय बुद्ध झी दथुइ हे दी - २

बिनोद साय्मि (आल)

न्ह्यान्ह्यां लँ म्हुइत:
मैत्रय वया मनूत नाप जानाः ई कथं ज्ञान बियाः थन विकसित न्हूगु सभ्यताया जग स्वनेत आपालं योजना, ग्वसाःया आवश्यक जुइ। मैत्रय कुहां झाये न्ह्यः लँ म्हुइगु ज्या धाःसा मय्जु हेलेना पेट्रोभ्ना ब्लाभात्स्की, मय्जु हेलेना इभानोभ्ना रोरिच/भाजु निकोलस रोरिच, एलिस बेलीपिंसं यानादीगु दु ।

युत्रे्कनय् जन्म जूम्ह मय्जु हेलेना पेट्रोभना ब्लाभात्स्की (सन १८३१�१८९१) विश्वन्यंकं दुगु "थियोसोफिकल सोसाइटी" (दकलय् न्हापां नीस्वंगु न्यूयोर्क अमेरिका, १८७५) या मू संस्थापक खः। वय्कलं गुरु महात्मा एल मोर्यायात सन् १८५१ अगष्टय् बेलायतय् नाप लाःगु खः। ब्लाभात्स्कीं च्वयादी, "छम्ह तःधिकःम्ह हिन्दू मनू भारतया राजकुमारपिं नाप छगू महत्वपूर्ण ज्याय् लण्डन वःगु व वय्कलं जितः धयादिल कि जिं छगू महत्वपूर्ण ज्याया लागिं तयारी यायेमाःगु दु गुकिया लागिं स्वदँ तक तिब्बतय् तयारी ज्या जुइ।" ब्लाभात्स्कीया दकलय् न्हापांगु सफू पूर्वीय व पश्चिमय् न्यनाच्वंगु धर्म व दर्शन बारे विश्व प्रणालीया जीवनयात कया च्वयातःगु "आइसीस अनभेल्द" खः। गुगु पिदंगुया झिन्हु दुने हे फुक्कं सफू चुल। पूर्वीय धर्म व दर्शनयात पश्चिम युरोपय् प्रचार यायेगुली वय्कःया तःधंगु ल्हाः दु। वय्कःया दकलय् नांजाःगु सफू "द सिक्रेट डक्ट्रीन" खः। 'सिक्रेट डक्ट्रीन' थियोसोफिया दकलय् मू वंगु सफू खः। थुकी ब्रम्हाण्ड, मनूया उत्पत्ति व विकास बारे च्वयातःगु दु ।

ब्लाभात्स्की भारतय् च्वनाच्वंबलय् वय्कलं अनया स्थानीय् आदिबासीतय्गु धर्म, संस्कार, संस्कृतियात तःधंगु इज्जत बिसें उमिगु धर्म, संस्कार, संस्कृति ल्यंका तयेत हःपाः बियादिल। अथे जुयाः स्थानीय आदिबासीतय्सं ब्लाभात्स्कीयात मेमेपिंत थें स्थानीय मनूतय्त क्रिश्चियन धर्मय् परिवर्तन यायेत वःम्ह कथं मखुकि भारतया स्थानीय धर्म व संस्कारया छम्ह धाथेंया च्यूताःमि कथं काः। ब्लाभात्स्कीयात स्थानीय आदिबासीतय्सं दुनुगलं लसकुस यात। ब्लाभात्स्की व हेन्री स्टील वल्काट (सन १८८० मे १९, विजयानन्द बिहार, गाल् श्रीलंकाय्) औपचारिक व सार्वजनिक कथं पंच शील कासें बुद्ध धर्म नाला काःपिं दकलय् न्हापांपिं युरोपियन नं जुल।
मय्जु हेलेना इभानोभ्ना रोरिच (सन् १८७९-१९५३) रुसया सेन्ट पित्सबर्गय् बूगु खः। वय्कः मचांनिसें बुद्धि बल्लाःम्ह खः। वय्कलं मय्जु ब्लाभात्स्कीं च्वयादीगु सफू "सिक्रेट डक्ट्रीन" यात रुसी भासय् ल्ह्ययादिल। सन् १९२० य् वयकःया निम्हतिपू (हेलेना व निकोलस रोरिच) जानाः "अग्नियोग गुथि" स्वनादिल। मय्जु हेलेना रोरिचया स्वापू महात्मा एल मोर्यानाप खः, महात्माया ग्वाहालिं वय्कलं दकलय् न्हापांगु सफू 'लिभ्स अफ मोर्याज गार्डेन' सन् १९२४ य् च्वयादिल। मय्जु रोरिचं महात्मा मोर्यानाप टेलिप्याथिक स्वापूपाखें अग्नियोगया १३ गू सफू झिंन्हय्दँया दुने च्वयादीगु खः। रुसी चित्रकार, दार्शनिक, लेखक भाजु निकोलस कोन्तानतिनोभिच रोरिच (सन् १८७४-९४७) नं अथेहे ७,००० ति किपा च्वया थकूगु दु। भाजु रोरिचं सन् १९२४-२८ य् साम्बाला मालेत थःगु पलाः न्ह्याकादिल। थुकी वय्कःया तिरि मय्जु रोरिचं नं ब्वति काःगु खः। रोरिच साम्बालाय् (थःगु भौतिक म्ह लिसें) थ्यंका अनया आपालं किपात किया थकूगु दु ।

मनूतय्गु सेवा यायेत मैत्रय:
आध्यामिक महात्मा गुरुपिं हलिंया हिमाल, पहाड, मरुभूमिइ द्वलंद्वः दँ तक च्वनादीसां झी मनूतय्सं थ्व खँ मसिउ। निक्वःगु बिश्व युद्ध क्वचायेधुंकाः सन् १९४५ जुनय् मैत्रयं 'जि आः कुहां वये त्यनागु दु' धयादिल। गुगुं नं इलय् मनूनाप जानाः सेवा यायेत मैत्रय तयार जुया च्वनादिल। मैत्रयं कुहां वयेगु घोषणा यायेधुंकाः वय्कः न्यादँया दुने वइगु भलसा काःगु खः। अथे जूसां निगूगु बिश्वयुद्ध लिपा नं राष्ट्रतय्सं हलिमय् शान्ति खयेकेगु लँपुइ पलाः तकं मल्ह्वंगु व झन लिखतं कति लाकेगु, लोभ, अन्याय, धेंधेंबल्लाः आदि पुलांगु हे लँपुइ लिनाः न्हूगु लँपु चायेकेगु पना बीवं "मनूत अझं न्हूगु ईया निंतिं तयार मजूनि" धकाः मैत्रयं थः वयेगु ई लिछ्याना यंकादिल। लिपा जुजुं मैत्रयं हाकनं घोषणा यानादिल कि "सुं तयार दुसां मदुसां जि आः वयेगु क्वःजित"। अनंलि मैत्रय थः च्वनाच्वंगु समुन्द्र सतहं ६००० मिटर तजाःगु हिमाल साम्बालां कुहां वल। (साम्बाला (सांग्रिला) धाःगु थाय् नेपाःया कारिकाल हिमालया लिउने लौकिक व अग्नी संसारय् दु धकाः 'द टक दज नट कुक द राइस, अ कमेन्ट्री अन द टिचिङ्ग अफ अग्नी योग' धाःगु सफूया पेज ७४ य् गुरु आर.एच.एचं. न्ह्यथनादीगु दु।) मैत्रय सन् १९७७ जुलाइ ८ य् छम्ह ल्याय्म्ह मनूया भेषय् कुहां वयाः पाकिस्तानया सम्म मैदानय् थ्यंकादिल। झीसं तसकं हनाबना तयाः पुज्याना वयाच्वनापिं द्यः महात्मात गथेकि सिद्धार्थ गौतम, राम, कृष्ण, जेसस आदिपिं थें मैत्रय धाःसा मनूया प्वाथं जन्म जूम्ह मखु। अथे धकाः सर्गतं कुहां वःम्ह नं मखु। हलिंया मनूतय् सेवाः यायेगु गुगु लक्ष्य खः दुगु खः व ताःलाकेत वय्कलं थःगु ल्याय्म्हगु म्ह थम्हं हे ज्यानादीगु खः। मनूत गुलि तगिं तक बिकास जुइधुंकूगु खः उगु हे तगिंयात ल्वइगु बिचाः यानाः वय्कलं थःगु थुगु म्ह ज्यानादीगु खः। मैत्रयया उगु ज्याना तःगु मनू म्ह थुगु संसारया लः फय् नाप भ्यलय् पुंकेत हिमालं कुहां वयाः पाकिस्तानय् छुं न्हि च्वनादिल। अनलिं सन् १९७७ जुलाई १९ य् वय्कः हवाइजहाजय् च्वनाः बेलायतया लण्डन थ्यंकादिल। मैत्रय थौंकन्हय् पूर्वीय् लण्डनय् (ब्रिकलेन एरिया) एसियनतय् पुचलय् च्वनादीगु दु। तर मैत्रय नां ब्वयाः म्हसी कथं मखु, छम्ह साधारण झी थेंजाःम्ह मनू जुयाः। लिपा वय्कलं लण्डनया अस्पतालय् बहनी बहनी भरिया जुयाः ज्या यानादिल। लण्डनय् मैत्रययात छम्ह महत्वपूर्ण मनू कथं कायेगु याः अथेसां वय्कः थ्वहे खः धकाः धाःसा उमिसं नं मसिउ ।

(कथहं)

More Stories Like this