न्हूगु बजेटया तयारी तीव्र, प्रतिपक्षीनापं सहलह
येँ (झीगु स्वनिगः)
इलय् हे न्हूगु बजेट हयेगु तयारीलिसे सरकारं दलतलिसेया सहलहयात तच्वयेकूगु दु । उपप्रधान लिसे अर्थमन्त्री भरतमोहन अधिकारीं मंगलवाः प्रमुख प्रतिपक्षी नेपाली कांग्रेसलिसे बजेटया विषयसं सहलह याःगु दु । वइगु स्वलायादुने मेगु सरकार दयेकीगु छााटकााट खनेमदयेवं सरकारं बजेटया तयारी न्ह्याकूगु खः । प्रधानमन्त्री झलनाथ खनालं सहमतीय सरकारया ग्यारेण्टी जूसा राजीनामा बिइगु स्पष्ट याःसां नं सहमतिया छु नं यकिन खाका मवनीगुलिं सरकारं बजेटया तयारी याःगु अर्थमन्त्रालय स्रोतं धाःगु दु । बजेट बारे सहमति चूलाकेत मंगलवाः सुथय् कोइराला निवास महाराजगञ्ज थ्यंम्ह अर्थमन्त्री अधिकारीं न्हूगु बजेटया नितिं ग्वाहालि यायेत कांग्रेस सभापति कोइरालायात इनाप याःगु खः । बैशाखय् हे बजेट हयेगु सरकारी तयारी नं कांग्रेसया बिरोधया कारण अवरोध जूगु खः । असारया न्हापांगु वालंनिसें हे पुरक बजेट शुरु यायेमाःगुलिं सहलह न्ह्याकूगु अर्थमन्त्रीया धापू दुसा नेपाली कांग्रेसं आः नं बजेटया नितिं सहमति क्यंगु मदुनि ।
