गृहमन्त्रीपाखें कारागार व्यवस्थापन विभागया निरिक्षण

येँ (झीगु स्वनिगः)

उपप्रधान लिसे गृहमन्त्री कृष्णबहादुर महरां कारागार व्यवस्थापन विभागया निरिक्षण यानादीगु दु । म्हिगः न्हिनय् स्वताः इलय् डिल्लीबजार कालिकास्थानस्थित विभागया ज्याकुथिइ थ्यंका वय्कलं विभागया निरिक्षण यानादिल । निरिक्षणय् गृह छ्याञ्जे लिलामणी पौडेल, गृह प्रवक्ता सुधीरकुमार शाह लगायत ब्वति दुगु खः । निरिक्षणया भmवलय् गृहमन्त्री महरां कारागारयात सुधार गृहया रुपय् पलिस्था यायेमाःगु बिचाः तयादिल । अपराधीतय्गु मानसिकताय् सुधार हयेमागु जुगुलिं उमित सुधार यायेत न्हुगु ढंगं बिचा यायेमाःगु मन्त्री महराया धापू खः । कानुनी रुपं जक स्वयां नं सामाजिक सांस्कृतिक रुपं नं उमित सुधार यायेमाःगु वय्कःया बिचाः खः । कारागारया नं सुधार यायेमाःगु बिचाः लिसे वय्कलं विभागया अधिकारीतय्त कारागार सुधारया प्रस्ताव तयार यायेत उजं बियादिल ।

गृह छ्याञ्जे पौडेलं आपालं कारागार तयातयेगु स्वयाः तःधंगु क्षमताया कारागार पलिस्था यानाः जिर्ण कारागारतपाखें बन्दीतय्गु स्थानान्तरण यायेमाःगु धयादिल । वय्कलं कारागारया अवस्था सुधारया नितिं मन्त्रालयसं प्रस्ताव न्ह्यब्वयेत उजं बियादिल । निरिक्षणया भmवलय् विभागया महानिर्देशक दुर्गाप्रसाद भण्डारीं देय्न्यंकया कारागारया अवस्था बारे गृहमन्त्री व छ्याञ्जेयात जानकारी ब्युगु खः । वय्कलं देय्न्यकया न्हय्निगू जिल्लाय् दुगु न्हय्प्यंगू कारागारया क्षमता खुद्वः व प्यसः व झिंप्यंगू दुगु व आः उगु कारागारय् झिंछद्वः व प्यसः व पीप्यम्ह बन्दीत दुगु जानकारी ब्युगु खः ।