भारतीय कांग्रेस पार्टीया नेपाः विरोधी भावना

भारतीय प्रधानमन्त्री डा. मनमोहन सिंहया रामलिला मैदानया घटना स्पष्टीकरण वीगु झ्वलय् सत्तारुढ कांग्रेस पार्टीया मूछ्याञ्जे दिग्विजय् सिंहं नेपाः विरोधी भावनाः सार्वजनिक याःगु दु । योगगुरु स्वामी रामदेवया सहायक नेपाली नागरिक बालकृष्णयात विना आधार व विना प्रमाण अपराधी धया नेपाः विरोधी भावना प्वंकादीगु दु । वयकःपिसं छु खँया आधारय् अथ्य धयादीगु खः धयागु खँ बांलाक सीमदुनिसां, रामदेवं सरकायात व्यूगु हाथ्यायात कयाः तमं जक अथ्य धयादीगु मखुला धयागु न्ह्यसः दनावःगु दु ।
बालकृष्ण नेपालय् बूम्ह खःसां नागरिक व थनयाम्ह खःलाकि भारतयाम्ह धयागु नं स्पष्ट मदु । नेपाःया यक्को मनूतय्सं प्रकृया पूवंकाः भारतया नागरिकता कयातःगु दुसा अथ्यहे यक्को भारतीयतय्सं नं नेपाःया नागरिकता कयातःगु दु । छगू देय्या नागरिकता त्वःताः मेगु देय्या नागरिकता कायेगु धयागु छुं नं कथं अपराध मखु ।
नेपाःया नागरिक जुसाः सःलंसः दँ न्ह्यः निसें भारतय् च्वंगु खँया आधारय् बाल कृष्णयात अपराध धाःगु खःसा नं थ्व पाय्छि मखु । गुलिख्य नेपाःया नागरिकत भारतय् च्वनाः ज्या याना वयाच्वंगु दुसा भारतया नं यक्को मनूत नेपालय् च्वनाः वन्द व्यापार याना वयाच्वंगु दु । अथ्यहे यक्को भारतीय नागरिकतय्सं नेपाःया जग्गा जमिन, छेँ न्यानाः च्वना वयाच्वंगु दु । नेपाःयाहे गुलिखय् उद्योगपति व राजनीतिक नेतातय्गु भारतय् थःगु छेँ दु । थुगुकथंया कारोवारया सम्पत्तिया खरीद विक्रीयात कयाः सुनां सुइतं नं अपराधी धायेफै मखु । सन् १९५० या सन्धिं हे थुगुकथंया अधिकार निगू देशया नागरिकतय्सं प्रयोग यानाः छ्यलावयाच्वंगु दु । थुज्वःगु सामान्य खँया जानकारी दिग्वि ज्यायाके मदैगु धयागु बांलाःगु खँ मखु ।
स्वामी रामदेवया भ्रष्टाचारया अन्तया याकेगु नितिं न्ह्याकूगु भूख हडतालं सत्तारुढ दल कांग्रेस व सरकारयात निश्चितरुपं माछिंका. व्यूगु दु । थुकियाहे लिधँसा कयाः भा ज पार्टी नं रामदेवया समर्थन यानाः २४ घौ धरना च्वंगु दु । अथ्यहे समाजसेवी अन्ना हजारौं नं रामदेवयात समर्थन यासे थौं अनसन च्वने त्यंगु दु ।
रामदेवया वारे सरकारया न्ह्यागुकथं मूल्यांकन यासां रामदेवया जवल्हाः वालकृष्णया वारे उगुकथंया द्वपं वीगु धयागु तसकं आपत्तिजनक खँ खः । भारतय् च्वनाच्वंगु खँया आधारय् सुनं नेपालीयात अपराधी धायेमज्यू । अपराध सावित मजूतले वा काुननंहे नमवाःतले अपराधी धायेगु अधिकार सुयातं नं मदु ।

More Stories Like this