सुडानकाण्डय् पुलांपिं स्वम्ह आइजीपी नापं ३६ म्ह विरुद्ध मुद्दा
येँ (झीगु स्वनिगः)
चर्चित सुडानकाण्डय् भ्रस्टाचार याःगु ठहर यानाः अख्तियार दुरुपयोग अनुसन्धान आयोगं स्वम्ह पुलांपिं आइजीपी, बहालवाला निम्ह एआइजी नापं प्रहरी अधिकृतत व ठेकदार यानाः ३६ म्ह विरुद्ध म्हिगः मंगलवाः मुद्दा दायर याःगु दु । राष्ट्रसंघया आह्वानय् सुडानपाखे खटेजुयाःपिं नेपाःया प्रहरीया नितिं एपीसी न्याःगु इलय् भ्रस्टाचार याःगु विषययात कयाः छानबिन लिपा आयोगं विशेष अदालतय् अथे मुद्दा दायर याःगु खः । अख्तियारं पुलांपिं आइजीपीपिं ओमविक्रम राणा, हेमबहादुर गुरुङ व रमेश चन्द ठकुरी, वहालवाल एआइजीपिं मदन खड्का व अर्जुन जंग बहादुर शाही नापं मेमेपिन्त अभियुक्त दयेका अथे मुद्दा दायर याःगु खः ।
