'सरकारयात ज्या मयाकेगु षडयन्त्र’

येँ (झीगु स्वनिगः)

वर्तमान सरकारं यानाच्वंगु ज्याझ्वःयात कयाः हीमी चायाच्वंपिं नेपाली कांग्रेसया नेतातय्सं प्रधानमन्त्री झलनाथ खनालयात नापलानाः थःपिनिगु खँ मन्यन धाःसा सशक्त कथं प्रतिकार यायेगु धकाः ख्याच्वः ब्यूगु दु । म्हिगः मंगलवाः प्रधानमन्त्री निवास वालुवाटारय् हे वनाः कांग्रेसया नेतातय्सं अथे ख्याच्वः बियादीगु खः । एमालेया नायः झलनाथ खनालया नेतृत्वय् एकीकृत माओवादी नापं मेमेगु दलत नं दुथ्याःगु वर्तमान सरकारयात ज्या याके मबिइगु षडयन्त्र कथं अथे कांग्रेसया नेतातय्सं ख्याच्वः बियाहःगु खः धकाः मनूतय्सं तिप्पणी यानादीगु दु । वर्तमान खनाल नेतृत्वया सरकारं न्हिया न्हिथंया दैनिकी ज्या बाहेक मेगु याये मदु धकाः दावी यानादिसें दीर्घकालिन लिच्वः लाइगु कथंया निर्णय यात धाःसा सशक्त प्रतिकार यायेमाली धकाः ख्याच्वः बियादीगु खः ।

विशेष यानाः सरकारं ज्या यायेगु नितिं ज्याछिंकेत थीथी थासय् राजनीतिक नियुक्ति यायेवं हीमी चायाः कांग्रेसया नेतातय्सं प्रधानमन्त्री खनालयात नापलानाः अथे ख्याच्वः बियादीगु खः । प्रधानमन्त्री निवासय् कांग्रेसया महामन्त्री प्रकासमान सिंह, एनपी साउद व दिलेन्द्रप्रसाद बडु वनाः अथे ख्याच्वः बियादीगु खः । वर्तमान सरकार कामचलाउ सरकार जक जूगुलिं राजनीतिक नियुक्ति याये दैमखु धकाः कांग्रेसया नेतातय्सं अथे ख्याच्वः बियादीगु खः । स्वंगू दलया दथुइ जूगु न्यागू बुँदाया सहमति कथं मूल खँ धैगु शान्ति प्रक्रिया पूवंकेगु खः धकाः धयाच्वंगु अवस्थाय् एकीकृत माओवादीं शान्ति प्रक्रियाया नितिं छुं हे धायेथाय् मदयेक दोहोरो सुरक्षा अन्त्य यानाः ब्यवहारय् लागू यानाः वनाच्वंगु नापं शान्ति प्रक्रियाया नितिं माःगु कथं ज्या यानाः न्ह्याः वनीगु संकेत वःगुलिं हीमी चायाः नेपाली कांग्रेसया नेतातय्सं वर्तमान सरकारया ज्याय् पंगः थनेफत धाःसा थःपिनिगु स्वार्थ पूरा जुइ धकाः तायेकाः अथे सरकारया ज्याय् पंगः थनेगु कथं न्ह्याः वंगु खः धकाः मनूतय्सं तिप्पणी यानाहःगु दु ।