'थ्व सरकार कामचलाउ खः'
येँ (सन्ध्या टाइम्स)/प्रधानमन्त्री झलनाथ खनालया वर्तमान सरकार कामचलाउ जक खः धकाः विपक्षी नेपाली कांग्रेसं दावी याःगु दु ।
प्रधानमन्त्री झलनाथ खनालं थम्हं याकनं हे राजीनामा बी धकाः न्यागू बुँदे सहमतिइ हस्ताक्षर याये धुंकूगु कारणं थ्व सरकार स्वतः हे कामचलाउ जूगु दावी कांग्रेस महामन्त्री प्रकाशमान सिंहं यानादीगु दु ।
अथे हे कांग्रेस सभासद् जगदिश्वरसिंह केसीं प्रम खनालं राजीनामा याइ धयातःगु सहमतियात संसदं हे अनुमोदन यायेधुंकूगु कारणं प्रधानमन्त्रीं राजीनामा हे मबिउसां नं सरकार कामचलाउ जुइधुंकूगु दावी नं यानादीगु दु।
तर सरकार कामचलाउ जूसां सरकारं ततःधंगु नियुक्ति व कर्मचारी सरुवा बढुवा यानाच्वंगुलिं उकियात तत्कालि दिकेमाः धकाः नं कांग्रेसं माग याःगु दु ।
थौं सुथय् नेपाली कांग्रेसया छगू डेलिगेशन हे वालुवाटार वनाः प्रधानमन्त्रीयात नापलासें वय्कः कामचलाउ प्रधानमन्त्री जक खः धकाः स्मरण याकूगु दु। कांग्रेस महामन्त्री प्रकाश मान सिंहया नेतृत्वय् वंगु उगु डेलिगेशनं सरकार आः कामचलाउ अवस्थाय् वनेधुंकूगु कारणं सरकारं विपक्षीलिसे सल्लाह मयासे ततःधंगु नियुक्ति व सरुवा बढुवा थेंज्याःगु ज्या याये दइ मखु धकाः सचेत याकूगु खः। यदि सरकारं हानं नं अज्याःगु ज्या यानाच्वन धाःसा थःपिं कडा रुपं प्रस्तुत जुइमाली धकाः नं वय्कःपिंसं ख्याच्वः बियादीगु खः ।
लिसलय् प्रधानमन्त्री खनालं थःपिं विपक्षीलिसे सल्लाह यानाः सहमतिया आधारय् न्ह्याः वनेत पूर्ण रुपं तयार दु धयादीगु खः। वय्कःपिनि दथुइ शान्ति प्रक्रियायात न्ह्यःने यंकेगु, संविधान च्वयेगु विषयय् नं खँल्हाबल्हा जूगु खः ।
संसदय् कांग्रेस कडा जुइगु
वर्तमान सरकार कामचलाउ जक खःसां थ्वं ततःधंगु नियुक्ति व सरुवा बढुवा यानाच्वंगु कारणं सदनय् उकिया प्रतिकार यायेगु तयारी नं नेपाली कांग्रेसं याःगु दु। थुकिया बारे सल्लाह यासें माःगु ज्याझ्वः तयार यायेत थौं नेपाली कांग्रेस संसदीय दलया बैठक च्वनेत्यंगु दु। थौं न्हिनय् च्वनीगु उगु बैठकं सदनय् सरकार विरुद्ध कडा रुपं प्रस्तुत जुइगु बारे सहलह याइ धाःगु दु। यदि थःपिंसं सचेत यानाः नं सरकारं खँ मन्यन धाःसा संसद अवरुद्ध यायेगु तकया ज्याझ्वः हये मालेफु धाःगु दु ।
