माओवादीया लडाकुत शिविरपाखे
येँ (सन्ध्या टाइम्स)/माओवादी नेतातय् सुरक्षाय् परिचालन जुयाच्वंपिं माओवादी लडाकूत निगूगु चरणय् थौं चितवनया शक्तिखोर वनीगु जूगु दु। पार्टीया उपाध्यक्ष, महासचिव, सचिव, स्थायी समिति व पोलिटब्यूरो दुजःतय् सुरक्षाय् खटे जुयाच्वंपिं ६५ म्ह लडाकुत ल्वाभः नापं ज्वनाः थौं शक्तिखोरया स्वंगूगु डिभिजन मुख्यालयय् वनीगु ज्याझ्वः दु। उपिं डिभिजन कमाण्डर सन्तु दराईया नेतृत्वय् शक्तिखोरय् वनेत्यंगु खः ।
येँया नयाँबजारय् च्वंगु पार्टी अध्यक्ष प्रचण्ड निवासय् थौं सुथय् छगू ज्याझ्वःया दथुइ इमित विदाई याःगु खः। विदाई ज्याझ्वलय् प्रचण्डं थ्वसिबें न्ह्यःया विदाईया ज्याझ्वलय् थें भावुक मजुसे लडाकुतलिसे च्वनाः किपा काःगु खःसा प्रचण्डया जःलाखःलातय्सं नापं लडाकुतय्त स्वांमाः क्वखायेकूगु खः ।
लडाकुतय्त प्रहरीया विशेष सुरक्षा कार्यदलं स्कर्टिङ यानाः शक्तिखोरय् यंकीगु जूगु दु। इमिगु निंतिं निगः माइक्रोबस व छगः स्कोरपियो गाडीया ब्यवस्था याःगु दु। अध्यक्ष प्रचण्डयात सुरक्षा बियाच्वंपिं ४९ म्ह लडाकुत शिविरय् थ्यंगु खः ।
