सछिदँ लिपा सफा याःगु तुंथिइ मूर्ति लुया वल
येँ (सन्ध्या टाइम्स)/थौं सिथि नखः। थ्व नखःबलय् स्वनिगलय् लःया स्रोत जुयाच्वंगु तुं सफा यायेगु चलन दु। छगू इलय् अथे तुं सफा यायेगु चलन मदया हे वनेधुंकूगु खःसां थौंकन्हय् लःया अभाव जुया वःगुलिं स्वनिगःया थीथी थासय् पुलांपुलांगु तुं हानं सफा यानाः लः पिकायेगु ज्या शुरु जुया वःगु दु। थ्वहे झ्वलय् म्हिगः येँया जनबाहा केलत्वालय् सछिदँ लिपा छगः तुं सफा यायेगु ज्या जूगु दु।केलत्वाःया क्वाछेँ ननिइ च्वंगु उगु तुं स्थानीयवासी नापं शहरी खानेपानी व सरसफाईया लागिं गैसस मंच लिसें शहरी वातावरण व्यवस्थापन समाज (युम्स) या मंकाः कुतलय् सफा यायेगु ज्या जूगु खः ।
स्थानीय मनूतय्सं धाः कथं थ्व तुं वंगु सछिदँ थुखे सफा याःगु सुनां हे मसिउ। तुं सफा यायेगु झ्वलय् म्हिगः अन दुने हनुमान द्यःया ल्वहंयागु मूर्ति छगू नं लुया वःगु दु। १० इंची ति दुगु उगु मूर्ति नापं शिलापत्र नं दयेमाः धइगु अनुमान याःगु दु। स्थानीयवासीं आः उगु मूर्ति विशेषज्ञयात क्यनेगु खँ धाःगु दु। तुं तसकं पुलांगु खःसां उकिया निर्माण गबलय् जूगु जुइ धइगु खँ धाःसा सीके मफुनि ।
स्थानीय भाजु संजय अमात्यं कनादी कथं २०४५ साल तक नं अन लः कयाः छ्यलाच्वंगु खः तर लिपा बुलुगु लः वयेवं अन लः कायेगु बन्द जुल ।
