माओवादी नेतातय् सुरक्षाकर्मी चिलेधुंकाः
जंगल त्वःताः खुल्ला राजनीतिइ वःपिं माओवादी नेतातय्त थः हे लडाकुतय्सं बियातःगु सुरक्षा प्रबन्ध चीका छ्वःगु दुसा उकी मध्ये आपालं लडाकु सुरक्षाकर्मीत हानं शिविरय् तुं लिहां वनेधुंकूगु दु। माओवादी नेतातय्त ल्वाभः सहितया लडाकुतय्सं सुरक्षा बीगु ज्यायात कयाः नेपाली कांग्रेसं आपत्ति प्वंकेवं माओवादीं 'दोहोरो सुरक्षा' हटे यायेगु निर्णय याःगु खः। माओवादीया थ्व निर्णयपाखें मेगु छुं मखुसां शान्ति प्रक्रियायात न्ह्यःने यंकेगु ज्याय् विश्वासया वातावरण ब्वलंकेगु ज्याय् धाःसा तिबः बीगु आशा यायेफु। थुकियात च्वछाये हे माः ।
दोहोर सुरक्षा प्रणाली चीकेधुंकाः आः माओवादीया नेतातय् सुरक्षायात कयाः कार्यकर्तायाके चिउताः पिहां वःगु समाचार नं पिदंगु दु। थ्व स्वाभाविक खः। माओवादी नेतात हिंसाया राजनीति यानाः वःपिं जूगुलिं उमित ईख तयाच्वंपिं मनूत नं उतिकं दयेफु। आः माओवादी नेतातय्त छुं नं कथंया सुरक्षा बिया तयेगु जिम्मा सरकारयागु खः। सुं नं माओवादी नेतायात छुं कथंया खतरा दुसा वयात माक्व सुरक्षा बीगु ज्या राज्यं यायेमाः। थ्व बाहेक ल्वाभः मदुपिं माओवादी कार्यकर्तातय्सं थः नेतायात सादा अंगरक्षक जुयाः सुरक्षा बीगु ज्या नं याना च्वनेफु। उकी सुनां नं आपत्ति याइ मखु। तर माओवादीं थःपिनि सुरक्षाया लागिं वयाच्वंपिं लडाकुतय्त लित छ्वयाः क्यंगु थ्व उदारता शान्ति प्रक्रियायात सफल यायेगु ठोस पलाः धाःसा जुइमाः। माओवादीं थ्व निर्णय याः थें आः मेमेगु पक्षतय्सं नं सहमति कथंया ज्या न्ह्याका यंकेमाः। माओवादीया थ्व पलाखं मेगु सकारात्मक लुखात चायेका यंकीगु आशा यायेछिं ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
