नखः क्वचाइगु अन्तिम नखः - सिथि नखः

लव कर्माचार्य

थगुनेया गथांमुगः चखःनिसें न्ह्याना वयाःच्वंगु दक्वं नखः थौंया न्हि कुन्हु क्वचाइ। सिथि नखः फुक्कं नखःचखःया अन्तिम नखः खः ।

षष्ठि अप्रभंस जुयाः सिथि जूवंगु खः। महाद्यःया कनिष्ठ पुत्रया नां खः कुमार षष्ठि वा सिथि कुमार खः। वसपोलया बाहन म्हय्खा खः। वसपोल बूगु न्हि कथं हे कुमार षष्ठि सिथिनखः धकाः माने याना वयाच्वंगु खः। गणेश व कुमार दाजुकिजा खः। छक्वः थुपिं मध्ये सु तःधं धइगु खँ जुल। महाद्यः पार्वतीं उमित सुनां याकनं सुमेरु पर्वत चाःहिला वइ वहे तःधं जुइ धयाबिल। धयाखतं कुमार ला थःगु म्हय्खा बाहनय् सवार जुयाः सुमेरु पर्वतपाखे वना हे छ्वत। गणेद्यः धाःसा छुँ गयाः गय् यानाः सुमेरु पर्वत वनेगु धकाः चिन्तित जुयाच्वंगु इलय् वहे छुं महाद्यः व पार्वती थें तःधंगु पर्वत गनं मदु। उमित हे चाःहिलाः तुति भ्वपुयादिसँ धकाः सुझाव बिल। गणेशं नं अथे हे यात। महाद्यः पार्वती लय्तायाः गणेशयात न्ह्याम्हेस्यां न्ह्यागु ज्या याःसां दकलय् न्हापां छंत निं पुज्यायेमाः धकाः आशिर्वाद बियादिल। धाथें सुमेरु चाःहिउवंम्ह कुमार धाःसा आशां द्याकेमाल धइगु बाखं दु ।

म्ह्याय् मचा नखः क्वचायेकः वःम्ह धकाः सिथि नखः कुन्हु त्वाःबहाःया चुकननिया तुं ल्वहंहिति सुचुपिचु यानाः थःगु म्ह व वस्त्र जकमखु छेँ नापं सुचुपिचु याइ। छन्हु न्ह्यः केलागु बागः माय्, मू व कःसूया स्वता बूबः लखय् फ्वयाः कन्हय् कुन्हु ल्वहंमाय् निनाः न्हापां पितृपिंतनिं आगं कथं थकयाः वहः छुइ। अनं थःपिनि फुफुकथं नखः हनी। देगु पुजा क्वचाइगु कथं गुलिसियां थौं तःधंक हे देगु पुजा कथं सिथि हनाच्वनी ।

अथे हे गुबलें गुबलें बुंगद्यः प्यन्हु न्ह्यः जावलाख्यः थ्यनाच्वंसा भोटो जात्रा मेला कथं हे सिथि नखः जावलाख्यलय् न्यायेकः वयाच्वंगु नं दइच्वनी। तर थुगुसी ज्यावलि पिसा लीगु साइत भचा मत्यःनि। थौंया न्हि निसें सिनाज्या शुरु जुइ कथं सिनाज्याया म्ये हालेगु शुरु जुइ। अले महासत्वया राग हालेगु बन्द जुइ।सिथि नखः नं नखःत क्वचाइगु जुयाः तछला व दिल्ला निला विश्राम थें जुयाच्वनी ।

थ्वयां प्यन्हु न्ह्यःया तृतिया तिथि कुन्हु येँया क्वःने न्हूद्यः त्वालय् सिथि द्यः न्हवं जुयाः थौंया सिथि कुन्हु फल्चाय् विधिपूर्वक यज्ञ कलश पुजा यानाः लसकुश यानाः विधिपूर्वक सिथि कुमारयात कर्म खंकाः चछि चाःहीकाः कन्हय् कुन्हु दक्व त्वाःया छेँय्छेँय् पुजा फयेकाः जात्रा यानाः क्वचायेकी। बहनी द्यः दुकायेवं जात्रा क्वचाइ।
सिथिनखः धुंकाः नेवाःतय् नखःचखः बन्द जुइ। नखःचखः बन्द यानाः सकलें वा पीगु सिनाज्यापाखे व्यस्त जुइ। थनिंनिसें गथांमुगः मत्यःतले धिमे आदि छुं नं कथंया सांस्कृतिक बाजं नं पिकाये मजिउ धाइ ।

More Stories Like this