ख्याच्वः ब्यूपिंत राज्यं कारबाही याइ : गृहमन्त्री महरा

येँ (झीगु स्वनिगः)

उपप्रधान लिसे गृहमन्त्री कृष्णबहादुर महरालिसे नेपाल पत्रकार महासङघया प्रतिनिधि मण्डलं सोमबाः गृहमन्त्रालयसं नापलानाः दीगु दु । पत्रकारदथुइ जुयाः वयाच्वंगु ल्हाः वायेगु घटनाया बारे केन्दि्रत जूगु खः । नापलाये ज्याय् महासङ्घया नायः शिव गाउालें जनकपुर, मोरङ, कञ्चनपुर लगायतया क्षेत्रय् पत्रकारतदथुइ बुखा च्वःगु हे कारण ल्हाः वायेगु व ख्याच्वः ब्यूगु घटनाया बारे गृहमन्त्रीयात जानकारी बीगु ज्या नापं जूगु खः । लिसलय् गहृमन्त्री महरां पत्रकारदथुइ ल्हाः वाइपिं व ख्याच्वः बिइपिंत राज्यं कानुनी कारबाही यायेगु धयादिल । ल्हाः वायेगु व ख्याच्वःया घटनाविरुद्ध प्रहरीइ उजुरी यायेत महासङ्घया टोलीयात इनाप यानादिसें वय्कलं दोषीदथुइ कानुनी कारबाही यायेगु धयादिल । वय्कलं पत्रकारदथुइ भचा नं ख्याच्वः वयेवं हे प्रहरीइ खबर यायेत इनाप यानादिल ।
'दमनय् लाःपिंत उजुरी याकेब्यू । घटनाया छानबिन यानाः दोषीयात कानुनी कारबाही जुइ । उकिया नितिं जिं क्वयेया निकाययात उजं बिइ,' वय्कलं धयादिल, 'पत्रकारतय्त गनपाखें नं भचा जक ख्याच्वः वःसां नं खबर यानादिसा ।'