बागमती खुसिइ महोत्सव न्ह्यात

येँ (झीगु स्वनिगः)

विश्व वातावरण दिवसया लसताय् आइतवाःनिसें झिंछक्वःगु बागमती खुसि महोत्सव न्ह्याःगु दु । पशुपतिस्थित बागमती खुसिया लिक्कपाखें औपचारिक रुपय् महोत्सव न्ह्याकूगु खः । पर्यटन बोर्ड लगायत छगू दर्जन संस्थातय्सं महोत्सवया ग्वसाः ग्वःगु खः । 'बागमती ल्यंकेत घरदैलो अभियान' धइगु नारालिसे पञ्चेबाजा थानाः महोत्सव उलेज्या याःगु खः । ज्याझ्वलय् वातावरणविद्पिं भुषण तुलाधर, मेघ आले लगायतपिंसं सभ्यताया रुपय् दुगु बागमती खुसिइ प्रदुषित जुयाः वनाच्वंगुलिं उकियात ल्यंकेगु नितिं महोत्सवया हे रुपय् अभियान न्ह्याकूगु धयादिल । महोत्सवया न्हापांगु दिं आइतवाः थीथी बिद्यालय व वातावरणया क्षेत्रय् ज्या यानाच्वंगु संघ संस्थाया प्रतिनिधितय्सं बागमती खुसि क्षेत्रय् सरसफाई ज्या न्ह्याकूगु खः । अभियान अन्तर्गत अरुण, सप्तकोशी, कणर्ली, कालीगण्डकी लगायत छगू दर्जन खुसिपाखें हःगु जल बागमतीइ ल्वाकः छ्याःगु खः । भदौ ३ गतेतक्क न्ह्याइगु उगु महोत्सवय् बृक्षारोपण, सरसफाई, चेतनामूलक ज्याझ्वःत न्ह्याकेगु जानकारी ब्यूगु दु ।

More Stories Like this