दबूपाखें जनगणनाया निंतिं येँय् जनचेतना ज्याझ्व:
'सुं नं त्व:मफीमा:, सुं नं दोहोरे मजुइमा:' धइगु नारा थ्वयेका: नेवा: देय् दबूलिं राष्ट्रिय जनगणनाया निंतिं येँ जनचेतना ज्याझ्व: यात ।
नेपाल सरकारया तथ्याङ्क विभागं न्ह्याकूगु झिंछक्व:गु राष्ट्रिय जनगणना (लैङ्गिकमैत्री व सामाजिक समावेशीयुक्त रष्ट्रिय जनगणना–२०६८)या तथ्याङ्क नेवाःतय्गु निंतिं मिथ्याङ्क मजुइमा धका: देय् दबूलिं न्ह्याकाः वयाच्वंगु जनचेतना अभियानया झ्वलय् वंगु शनिवाः येंया थीथी थासय् पर्चा इनेज्या याना: जनचेतना ज्याझ्व: या:गु ख: ।
जनचेतना ज्याझ्वःया झ्वलय् देय् दबूया नाय: नरेश ताम्रकारं जनगणना तथ्याङ्क राजनीतिनाप प्रत्यक्ष स्वापु दुगु धयादिल । वय्कलं थुगु इलय् राज्य पुनर्संरचना व समावेशी राज्य सहितया न्हूगु संविधान दय्केगु ज्या जुयाच्वंगुलिं सरकारं क्व:छिउगु नीति व ज्याझ्व:पाखें जनगणनाय् प्रभावित याइगुलिं जनचेतना ज्याझ्वः व पर्चा इनेमा:गु धयादिल ।
ताम्सिपाखाय् च्वंगु नेवाः देय् दबुया ज्याकूथीं न्ह्याःगु उगु ज्याझवः पुलां धःक्व, क्षेत्रपाटी, थँहिति, त्यौड, असन जुकाः बालकुमारी, केलत्वाः, इन्द्रचोक, मखं, बसन्तपु, चिकंमुगल, जैसिदेवल, लगं, ब्रम्हत्वाः, ह्यूमत, मरु, यट्खा जुया: नरदेवी वना: जनचेतना थनेगु व पर्चा इनेज्या क्वचा:गु खः ।
वइगु असार ३ गते निसें छेँ छेँ वया जनगणनाया लागत काःवइगु इलय् सकल नेवाःतय्सं थःगु मांभाय् नेवा: भाय् च्वकेगु, थःगु जात वा जातिस नेवाः च्वकेगु खँय् नेवाः देय् दबुलिं देय्न्यंकया नेवाःतय्त विशेष इनाप याना वयाच्वंगु दु ।
अथेहे थःगु निगूगु भाय् कथं थःपिं नापं स्वापू दुपिं मेपिं आदिवासी जनजातिया भाय् च्वयेत व जलाखलापिंत नं निगूगु भाय् कथं नेवाः भाय् च्वकेत इनाप यासें देय् दबूलिं जनचेतना अभियान न्ह्याकाः वयाच्वंगु खः ।
More Stories Like this
कन्याम इलामय् नेपालभाषा कक्षा न्ह्यात धिमे बाजं व भाषा प्रशिक्षण ज्याझ्वः क्वचाल थुर्पुय् स्वक्वःगु लाखे प्याखँ धेधेबल्ला ओखलढुंगाय् नेपालभाषा कक्षा क्वचाल नेवाः देय् दबू ओखलढुंगा तदर्थ समिति स्वन
