माओवादी नेतातय्त सुरक्षा समस्या

येँ (सन्ध्या टाइम्स)/एकीकृत माओवादीं शान्ति प्रक्रियाय् ग्वाहालि जुइकथं थः नेतातय्त बियातःगु दोहोरो सुरक्षा अन्त्य याये धुंकाः पार्टीया नेतातय्गु सुरक्षाय् समस्या वयेफु धकाः नेतानिसें कार्यकर्तातय्सं नं चर्चा यानाहःगु दु।
माओवादी अध्यक्ष प्रचण्ड पुलांम्ह प्रधानमन्त्री जूगु ल्याखं वय्कः छम्हेसित गृह मन्त्रालयपाखें कमाण्डो फोर्स हे परिचालन यानाः सुरक्षा बीगु व्यवस्था यायेत्यंगु दुसां मेपिं नेतातय्गु सवालय् धाःसा छु गथे यायेगु धकाः पार्टी कार्यकर्तातय्सं चिन्ता प्वंकाहःगु दु ।

पार्टीया पोलिटब्यूरो तह तकया दुजःतय्त सुरक्षाया नितिं अनमिनं प्रमाणित यानातःगु ल्वाभः बियातःगु खःसा व ल्वाभः नं लित बीमाःगु अवस्थाय् पार्टी अध्यक्ष बाहेक मेपिं नेतातय् सुरक्षाया नितिं समस्या ब्वलना वःगु खँ माओवादीया छम्ह राज्य समिति स्तरया नेतां धयादीगु दु।
शान्ति प्रक्रिया पूमवनीगु नापं न्हूगु संविधान तकं जारी मजूनिगु थ्व संक्रमणकालिन अवस्थाय् वय्कलं छखे पार्टी पिनेया ल्याखं सुरक्षाया समस्या खःसा मेखे पार्टी दुनेया ल्याखं नं सुरक्षाया समस्या दु धयादीगु दु। पार्टीया अध्यक्ष बाहेकया नेतातय्सं आः थःपिनि हे कार्यकर्तातय्त 'बडी गार्ड' कथं तयेमालीगु जुयाः हे अथे समस्या ब्वलना वःगु खः ।

विशेष यानाः लिपांगु इलय् पार्टी दुने निगू लाइन संघर्षं यानाः छगू लाइनया नेता व कार्यकर्तातय्सं मेगु लाइनया नेतायात तकं ख्याच्वः बिया हयाच्वंगु खँ सार्वजनिक जूगु अले उगु घटनायात कयाः आः तक नं दोषीयात कारवाही मयाःनिगु अवस्थाय् नेतातय् सुरक्षाया सवालय् कार्यकर्तातय्सं चिन्ता प्वंकूगु खः ।

लडाकुत थौं शिविर लिहां मवंनीगु
माओवादीया नेतातय्त सुरक्षा बिया वयाच्वंपिं लडाकुतय्त थौं हे चितवनया शक्तिखोर शिविरय् छ्वयेगु धकाः धाःसां थौं धाःसा उपिं लिहां वनेगु ज्याझ्वः स्थगित जूगु दु। माओवादीया नेता सुरक्षाया नितिं वयाच्वंपिं ६६ म्ह लडाकुत थौं ल्वाभः सहित चितवनया शक्तिखोरस्थित तेस्रो डिभिजनय् वनेगु ज्याझ्वः दुगु खः। छुं छुं नेतात स्वनिगलं पिने जुयाच्वंगुलिं थौंया उगु ज्याझ्वः स्थगित जूगु खः धाःगु दु। फुक्कं नेतातय्त बियातःपिं १०५ म्ह सुरक्षाकर्मी मध्ये छगू पुचः म्हिगः हे शक्तिखोर थ्यंकेधुंकूगु दु ।