छगू करोडया लुँ ज्वनाः कालिगढ बेपत्ता
येँ (सन्ध्या टाइम्स)/येँया छगू लुँवहः पसलय् ज्या यायेत तयातःम्ह छम्ह बंगाली कालिगढ थः हे ज्या यायेगु पसः लगायत मेमेपिनिगु समेत यानाः छगू करोड स्वयां अप्वः दां बराबरया ध्यबा व लुँ ज्वनाः बेपत्ता जूगु दु ।
वंघःया गहना गृह नांगु पसलय् ज्या याइम्ह उम्ह बंगाली कालिगढ पसलय् दयेकेत हयातःगु गाहाकितय् लुँ व पसःथुवाःया ध्यबा समेत ज्वनाः शुक्रवाः बेपत्ता जूगु खः।
पसःथुवाः राजेन्द्र शाक्यं बियादीगु जानकारी कथं उम्ह कालिगढ पसःया २५ तोला लुँ व वयात त्यासा कथं बियातयागु न्यागू लाख दां ज्वनाः बेपत्ता जूगु खः। वयात भाजु शाक्यया इतुम्बाहालय् च्वंगु छेँय् तुं बालं तयातःगु खः। लिसें वं वंघःया हे मेम्ह लुँवहः पसल्यायागु नं छगू किलो लुँ ज्वना वंगु दु। पसल्यां वयात ब्याज वइ कथं उगु लुँ त्याय् बियातःगु खः ।
उकथं हे वं मेमेपिं नं आपालं मनूतय्के निगू स्वंगू लाख यानाः आपालं दां त्याय् कयातःगु दु। फुकसिगुं यायेबलय् वं करिब छगू करोड स्वयां अप्वः सम्पत्ति ठगे याना यंकूगु खनेदु धाःगु दु ।
अथे हे ५० दँ ति दुम्ह निमाई मान्ना नांयाम्ह उम्ह कालिगढ भारत कोलकाताया मेदिनापुरस्थित साइपात धाःगु थासय् च्वंम्ह खः। वं भाजु शाक्ययाथाय् ज्या यानाच्वंगु हे झिदँ दयेकल। सत्संग धर्मय् लगे जुयाच्वंम्ह विशुद्ध धर्मात्मा जूगुलिं वयात सुनां थनया नेवाः लुँ व्यापारीतय्सं नं तसकं पत्याः यानातःगु खः ।
घटनायात कयाः प्रहरीइ जानकारी बीधुंकूगु दु। प्रहरीं थुकिया बारे कडा छानबिन यायेगु व भारतीय प्रहरीया समेत ग्वाहालि कायेगु जुइ धाःगु दु। थौंकन्हय्या आपालं लुँवहः व्यवसायीतय्सं बंगाली कालिगढ हे तयाः ज्या यानाच्वंगु दु ।
