पत्रकारयात दाःम्ह युथफोर्स कार्यकर्ता ज्वन
येँ (सन्ध्या टाइम्स)/ एमाले समर्थित युथफोर्सया नेता कार्यकर्ता विरुद्ध समाचार च्वल धकाः पत्रकार खिलानाथ ढकाल यात वंगु चान्हय् आक्रमण याःपिं मध्ये छम्हेसित प्रहरीं ज्वंगु दु। पत्रकारयात आक्रमण याःपिं युथफोर्सया कार्यकर्तात मध्ये विराटनगरया अध्यक्ष रोहित कोइरालायात ज्वनागु खँ मोरङ प्रहरीं धाःगु दु ।
'नागरिक' न्हिपौया पत्रकार ढकालयात युथफोर्सया जिल्ला अध्यक्ष परशुराम बस्नेतया निर्देशनय् कोइरालाया योजना कथं वंगु चान्हय् १० बजे महेन्द्र चोकय् सःताः जिल्ला शिक्षा ज्याकू लिक्क यंकाः दाये फक्व दाःगु खः। आक्रमणकारी सवारी साधन चालक मनोज राईयात नं प्रहरीं मालाच्वंगु दु ।
