रुपा महर्जनयात मोति पत्रकारिता सिरपाः

य ल(सन्ध्या टाइम्स)/नेवाः प्रेस दबू नेपाःया स्वक्वःगु दँमुँज्या संविधानसभाया उपसभामुख पूर्णकुमारी सुवेदीं उलेज्या यानादिल। यलया ललितपुर बार एसोसियशनया हलय् जूगु उगु ज्याझ्वः दबूया नायः नरेन्द्र श्रेष्ठया सभापतित्वय् जूगु खः। ज्याझ्वःया मू आकर्षण कथं मोति पत्रकारिता सिरपाः "झीगु स्वनिगः" न्हिपौया कार्यकारी सम्पादक रुपा महर्जनयात लःल्हाःगु खः ।

ज्याझ्वलय् सिरपाः त्याकादीम्ह मय्जु महर्जनया नां ग्वसाः खलःया सल्लाहकार नरेन्द्रबहादुर प्रधानं घोषणा यानादीगु खःसा वय्कलं हे सिरपाः त्याकादीम्ह मय्जु महर्जनयात न्याद्वः तकाया दां सिरपाः लिसें दसिपौ नं लःल्हानादीगु खः। ग्वसाः खलकं थःपिनि परम्परा कथं उगु सिरपाः त्याकादीम्ह व्यक्तिया नां अन हे घोषणा याःगु खः ।

ज्याझ्वलय् नेपालभाषा, संस्कृति उत्थानया ख्यलय् समर्पित स्वनिगःया स्वम्ह व्यक्तित्वपिंत हनेगु ज्या नं जूगु खः। उकी येँ लागापाखें वि.सं.२००७ सालंनिसें नेपालभाषां समाचार वाचन यानादीम्ह साहित्यकार हरि श्रेष्ठ, यलपाखें कार्तिक नाच व्यवस्थापक निर्देशक हरिमान श्रेष्ठ व ख्वपं व्याकरणविद् रमापतिराज शर्मायात दोसल्लां न्ययेकाः हनेगु ज्या जूगु खः ।

ज्याझ्वलय् नुगःखँ प्वंकेगु झ्वलय् ग्वसाः खलःया सल्लाहकार सुरेश खड्गीं नेवाःतय्सं राजनीतियात नं कःघानाः थःगु ज्याझ्वः न्ह्याकेमाःगु खँय् बः बियादिल । मूछ्याञ्जे विनोद रंजितं वार्षिक प्रतिवेदन न्ह्यब्वयादीगु खःसा दांभरि निर्जला ताम्राकारं आर्थिक प्रतिवेदन न्ह्यब्वयादीगु खः। अथे हे सल्लाहकार समाजसेवी मोतिलाल सिल्पकारलिसें प्रेस दबू यल शाखाया नायः सुविन श्रेष्ठ व येँ शाखाया नायः सुगतरत्न सिन्दुराकारं नं नुगःखँ प्वंकादीगु खः। ज्याझ्वलय् न्वकु मञ्जु बज्राचार्यं सुभाय् देछानादीगु खः ।