नेवाः ज्याकःमि गुथिया ज्याकू उलेज्या
येँ (सन्ध्या टाइम्स)/येँ महानगरपालिकाया नेवाः कर्मचारीतय्सं पलिस्था याःगु नेवाः ज्याकःमि गुथिया ज्याकू वंगु शुक्रवाः छगू ज्याझ्वःया दथुइ उलेज्या याःगु दु ।
महानगरपालिकाया वातावरण विभाग टेकुइ जूगु उगु समारोहया मूपाहां नेपालभाषा आकादेमिया चान्सलर सत्यमोहन जोशी जुयादीगु खः। येँ महानगरपालिका नेवाः ज्याकःमि गुथिया नायः नरेन्द्रराज श्रेष्ठया सभापतित्वय् जूगु उगु ज्याझ्वलय् एकीकृत माओवादीया नेवाः राज्य समितिया इन्चार्ज नापं सभासद् हितमान शाक्य, एमालेया सभासद् डा. मंगलसिद्धि मानन्धर, नेपाली कांग्रेसया सभासद् तिर्थराम डंगोल, येँ महानगरपालिकाया पुलांम्ह मेयर पिएल सिंह, नेवाः स्वायत्त राज्य मंकाः संघर्ष समितिया नायः गजेन्द्रमान मानन्धर, मंकाः संघर्ष समितिया सचिवालयया कजि मल्ल के. सुन्दर, नेपाली कांग्रेस येँ जिल्ला सभापति भिमसेनदास प्रधानपिंसं न्ववानादीगु खः। ज्याकःमि गुथिया महासचिव धर्म मुनिकारं लसकुस यानादीगु उगु ज्याझ्वलय् नासः सृष्टि कलापाखें सांस्कृतिक ब्वज्या नं याःगु खः ।
सिथि नखःया लसताय् याःगु ज्याझ्वलय् पाहांपिंसं नेवाः कर्मचारीत जानाः नेवाः कर्मचारीतय्गु हे ब्यागलं कथंया संगठन निर्माण यायेगु ज्या थ्व इतिहासय् न्हापांखुसी खः धयादिसें थुगु ज्यायात ग्वाहालि यायेत थःपिं नं तयार दु धकाः बचं बियादीगु खः। नेवाः ज्याकःमि गुथिपाखें महानगरपालिकाया वातावरण विभागय् गुथिया कचा दयेकेगु ज्या जुइधुंकूगु नापं आः मेमेगु विभागय् नं उगु हे कथं नेवाःतय्त भेला यानाः गुथिया कचा दयेका वनेगु जुइ धाःगु दु ।
