सत्ता व भत्ताया कासाय् सभासद्त

नरेन्द्रमान श्रेष्ठ गोंगजु

संविधानसभाया ई स्वलाया लागि तनेगु ज्या जुल। सत्ता व भत्ताया कासाय् न्ह्यानाच्वंपिं सभासद्तय्गु चरित्र स्वयेबलय् आः नं क्वःछिउगु इलय् शान्ति सम्झौता पूवनी अले संविधान दयेकेगु ज्या जुइ धकाः जनतां विश्वास यायेगु अवस्था मदुनि। थःपिंसं क्वःछिनागु इलय् संविधान दयेके मफयाः संविधानसभाया ई तनेत जक सत्ता मदयेक मगाःपिं थीथी राजनैतिक दलया नेतातय्गु चरित्रं यानाः संविधानसभाया ई तनेत अनेकौं नौटंकी याःगु खनेदु। थगुने संविधानसभाया ई तंगु इलय् एमाले, कांग्रेस व मधेसवादी दलत सत्ताय् दुगु खःसा माओवादी सत्तां पिने लाःगु खः। थःपिं सत्तां पिने लाःबलय् माओवादीं ई तनेत आलताल यानाच्वंगु खः। तर थुगुसी धाःसा कांग्रेस व मधेसवादी दलत सत्ताय् मदु। थ्व इलय् कांग्रेसं संविधानसभाया ई तनेगु निंतिं अनेकौं नौटंकी क्यना बिल। थज्याःपिं चरित्र मदुपिं राजनैतिक नेता, सभासद्तय्सं संविधान दयेकी धकाः विश्वास यायेगु अवस्था मदु। संविधानसभाय् प्रतिनिधित्व यानाच्वंपिं थीथी दल व सभासद्त सत्ता व भत्ताया लागि जक थीथी चलखेल यानाच्वंगु प्रस्ट नक्सां क्यनाच्वंगु दु ।

संविधानसभाय् प्रतिनिधित्व यानाच्वंगु थीथी राजनैतिक दलतय् सभासद्तय्सं जनतायात ध्वं लानाच्वंगु दु। धायेमाल धाःसा थीथी राजनैतिक दलतय् संविधान दयेकेगु ला इच्छा हे मदु। यदि राजनैतिक दलत गम्भीर जुयाः संविधान दयेकेगु ज्याय् न्ह्यज्याःगु जूसा स्वदँया ई धयागु संविधान दयेकेगु निंतिं पर्याप्तगु खः। मेमेगु देशय् निदँया दुने हे संविधान दयेकेगु ज्या जुयाच्वंगु आपालं दसुत दु। तर नेपालय् धाःसा स्वदँ-स्वदँ तक नं संविधान दयेके मफुगु व शान्ति सम्झौता पूवंके मफुगुया मू हुनि धयागु हे राजनैतिक दलत सत्ता व भत्ताय् जक तक्यनाच्वंगुलिं खः। सत्ताय् च्वनाः देशयात लुटे यायेगु व सभासद् जुयाः भत्ता पचे यायेगु ज्याय् राजनैतिक दलया थुपिं नेता व सभासद्त पल्के थुयाच्वंगु दु। उकिं संविधानसभाया ई जक तनेगु ज्याय् लगे जुयाच्वन ।

संविधान दयेकेत व शान्ति सम्झौता पूवंकेत संविधानसभाय् दुगु दलत फुक्क छथाय् च्वनाः सहमति व सहकार्य यायेमाः तर थीथी राजनैतिक दलतय् आन्तरिक कचवनं यानाः हे राजनैतिक दलतय् दुने सहमति जुयाच्वंगु मदु। संविधानसभाय् दुपिं स्वंगू तःधंगु दलत माओवादी, एमाले व कांग्रेस जक मखु मधेसवादी दलतय् दथुइ नं आन्तरिक मतभेद, गुटबन्दी दुसा मधेसवादी दलत ला कुचा कुचा हे जुयाच्वंगु अवस्था दु। अले थःगु पार्टीया सरकारया विरोध यानाः विपक्षी पार्टीया न्हिप्यं जुयाच्वंपिं नेतातय्सं सरकारयात सहयोग मयायेगु व संविधान दयेके मबीगु षडयन्त्र यानाच्वंगुलिं देशय् थज्याःगु अवस्था सिर्जना जुयाच्वंगु खः। थःगु पार्टी दुने इमान्दार मजूपिं नेतात गथे जुयाः देश व जनताप्रति इमान्दार जुइ? थज्याःपिं नेतात�पाखें होशियार जुइमाः। निदँया दुने संविधान दयेकेगु धकाः ई काःपिं सभासद्तय्सं स्वदँ तक नं संविधान दयेके मफु। थःपिं सत्ताय् मथ्यंकं संविधान दयेकेगु ज्या जुइ मखु धइगु मानसिकतां यानाः संविधान दयेकेगु ज्या न्ह्याके मफयाच्वंगु खः। स्वदँ तक संविधानसभाय् प्रतिनिधित्व यानाच्वंगु दलत सत्ताया चलखेलय् जक न्ह्यानाच्वंगुलिं संविधान दयेके मफयाच्वंगु खः ।

सरकार व संविधान च्वयेगु बिस्कं बिस्कं विषय खः। सरकारं दैनिक प्रशासन चले याइगु खःसा संविधानसभां संविधान च्वयेगु ज्या याइगु खः। उकिया लागि थीथी विषयगत समितित दयेका तःगु दु। अय्नं पावरय् च्वनाः थःगु स्वार्थ पूवंकेगु लागिं संविधान च्वयेगु विषययात थीथी दलतय्सं सरकारनाप स्वानाः सत्ता मदयेकं संविधान च्वये मफइ कथंया व्यवहार क्यनाः ज्याय् पंगः थनाच्वंगु दु। थुगु हे कारणं इलय् संविधान निर्माण मजूगु खः। वास्तवय् सरकारं संविधान च्वइगु मखु। संविधान च्वयेत संवैधानिक समिति व थीथी उपसमितित दु। अय्नं संविधान च्वयेगु खःसा दकलय् न्हापां पावर शेयरिङ्ग हे यायेमाः धयागु कारणं हे संविधान दयेकेगु स्वयां नं सत्ताय् गथे यानाः वनेगु धकाः दलत लगे जुयाच्वंगु खः। थुकथं स्वयेबलय् संविधानसभाय् प्रतिनिधित्व यानाच्वंपिं थीथी दलतय्सं गनं जनतायात ध्वं जकं लानाच्वंगु मखु ला? पालंपाः सत्ताय् च्वनेगु नामय् गनं थःथःगु स्वार्थ पूवंकेगु, कमिशन जक ज्या यानाः संविधान च्वयेगु ज्यायात अलपत्र जकं याना बीत्यंगु मखु ला? मुखसा निला निला तक संवैधानिक समितिया बैठक तकं मच्वंगुया कारण छु? अले संविधानसभाया सभापति व संवैधानिक समितिया सभापतिं थःगु पद जक घय्पुनाः खालि भत्ता जक पचे यानाच्वंगु दु। प्रमुख दलत व सभासद्त इमान्दार व देश प्रति उत्तरदायी मजूगु कारणं स्वदँ स्वदँ तक नं शान्ति सम्झौता पूमवंगु व संविधान दयेके मफुगु खः। नेपाःया राजनैतिक दलतय् वरिष्ठ धाःपिं नेता थेंज्याःपिं निर्लज्ज नेतात शायद हे जक विश्वय् गनं दइ। अले थज्याःपिं नेतातय्त साथ बीपिं कार्यकर्तात झन हे निर्लज्जपिं खः। स्वदँ स्वदँया इलय् नं संविधान दयेके मफुगुया मुख्य दोषी संविधानसभाय् दुपिं थीथी दलत व सभासद्त हे खः। अय्नं कांग्रेसया सभासद् रामचन्द्र पौडेलं संसदया बैठकय् संविधान निर्माण मजूगुया फुक्कं दोष माओवादीयात बिउगु दु तर थुकी माओवादी जक दोषी मखु स्वयं रामचन्द्र पौडेल व कांग्रेस लगायत संविधानसभाय् दुथ्याःपिं ६०१ म्हं हे सभासद्त दोषी खः। रामचन्द्र पौडेल ला झन प्रधानमन्त्री कुर्सीया लागिं झन् हे लोभीम्ह मनू खः। प्रधानमन्त्री जुइत पौडेलं क्यंगु हठया कारणं झिंन्हय्क्वः तक प्रधानमन्त्रीया चुनाव याये माःगु खँ सकस्यां सि हे सिउ। यदि कांग्रेस सत्ताया लोभी मजूगु खःसा झिंन्हय्क्वः तक रामचन्द्र पौडेलयात प्रधानमन्त्रीया उम्मेदवार यानाः न्ह्यला तक संसद ठप्प यायेमाःगु छाय्? संविधानसभाय् थज्याःपिं लोभी नेतातय्सं यानाः हे इलय् संविधान दयेके मफुगु खः। थुकिया लागिं ६०१ म्हं हे सभासद्त दोषी खः। छगू दलयात द्वपं बियाः थः चोखो धकाः जनताया दथुइ भ्रम ब्वलंकेगु ज्या याइपिं नेतात खनाः जनता होशियार जुइमाः। आः थप जूगु इलय् संविधान दयेके फयेमाः अले संविधानसभाया ६०१ म्ह सभासद्तय्त लज्या, बुद्धि व विवेक दयेमा धकाः भगवान पशुपतिनाथयाके प्रार्थना यानाच्वना ।

More Stories Like this