बाबा रामदेवया अनसनं थंगु न्ह्यसः

योगागुरु बाबा रामदेवं यानादीगु अनसन ज्याझ्वलं यानाः पूरा भारत अस्थिर जुयाच्वंगु दु। भारतय् वंगु छुं न्हि न्ह्यवंनिसें रामदेवया अनसन बारे हे जक व्यापक चर्चा जुयाच्वंगु दुसा थुकिं यानाः राजधानी न्हूदिल्लीया स्थिति नं असामान्य जूवंगु दु। वय्कःया अनसन ज्याझ्वःयात सरकारं कटु आलोचना याःगु व विपक्षी भाजपां पूर्ण समर्थन याःगु कारणं यानाः बाबाया थ्व अनसन मुक्कं हे छगू राजनीतिक कार्यक्रम जूवंगु दु। राजनीतिक कार्यक्रम जुइसातकि अन पक्ष विपक्षी दइगु स्वाभाविक खःसा अज्याःगु अवस्थाय् बाबा रामदेव नं बाबा मजुसे छम्ह पक्ष वा विपक्षया नेताय् रुपान्तरण जूवनीगु निश्चित दु गुम्हेसित आम नेता सरह न्ह्याम्हेस्यां ब्वः बिउसां जिउ, आलोचना याःसां जिउ। थःत थ्व रुपय् परिवर्तन यायेबलय् थःगु उचाई थहां वनीगु खः लाकि कुहां वनीगु खः, व वय्कलं बिचाः याःगु हे दयेमाः ।

योग व प्राकृतिक उपचारया माध्यमं बाबा रामदेवं भारतय् जक लखौं शिष्य व अनुयायी दयेकातःगु दु। योगया ख्यलय् वय्कः सुयां पक्ष वा विपक्ष मखु। अन आः यानादीगु राजनीतिक कार्यक्रमं वय्कःयात पक्ष व विपक्षय् विभाजित याना बिउगु दु। भारतय् नकतिनि क्वचाःगु थीथी प्रान्तया चुनावय् शुन्यय् कुहां वःपिं भाजपां थ्व अवसरयात उपयोग यायेत स्वइगु स्वाभाविक हे जुल, तर सरकार पक्षीय कार्यकर्तातय् लागिं धाःसा बाबा छम्ह योगगुरु मजुसे भाजपाई नेता जुया बी। बाबां गुगु मुद्दाया लागिं थ्व अनसन च्वनेत्यंगु खः व लसकुस यायेबहः जू, तर उकिया लागिं वय्कलं ज्वंगु तरिका धाःसा वय्कःयात ल्वः मजू। वय्कः थ्व फोहोरी राजनीति स्वयां च्वय् च्वनेमाःम्ह योगी खः ।

More Stories Like this