मैत्रय बुद्ध झी दथुइ हे दी - न्हूगु युगया लुखा चायेकेत

बिनोद साय्मि (आल)

मैत्रय बुद्धं पृथ्वीइ मनूया सेवा यायेगु योजना कथं थःगु खुल्ला ज्याझ्वः न्ह्याके धुंकूगु दु। मैत्रय् झाःगु व न्हूगु युगया ज्याझ्वः न्ह्याःगुया लसकुस चिं सर्गतय् स्पेशयानत प्यंगः वयाः प्यंगू दिशाय् च्वन। संसारय् अशान्ति, अन्याय, भय, ग्याःचिकुं खयाच्वंगु इलय् झीके झीसं जन्म कयागु हलिंया भिं स्वये खनीगु खःला मखुला धइगु शंका निराशाया दथुइ आशाया थीगु जः ज्वनाः मैत्रय बुद्व थौंकन्हय् कुहां झायाः झी लिसें जीवन हनाच्वनादीगु दु। सन् १९७७ निसें मैत्रय् लण्डनय् एसियनतय् पुचलय् छम्ह साधारण मनूया भेषय् दी। मैत्रय् नापं हलिंया सेवा यायेत कुहां वयाच्वंपिं महात्मातय्सं थौं कन्हय् हलिमय् आपालं कथं सकलें ज्यः जुइक चमत्कारत जुयाच्वंगुया नापं समस्याय् लानाच्वंपिन्त ग्वाहालि बियाच्वंगु रिर्पोटत वयाच्वंगु दु। मैत्रय्या ताः व आज्जु मनूतय्त हःपाः बियाः न्हूगु ई कथं शिक्षा बीगु व न्हूगु लुँ सभ्यताया बिकास यानाः थुगु हलिंयात लुँ युगय् थ्यंकेगु खः। मैत्रयं धयादीविश्व शान्तिया निंतिं दकलय् न्हापां माःगु सिद्धान्त हलिमय् दुगु सकतां श्रोत साधनया मंकाः छ्यला (sharing) खः ।

निराशाया दथुइ आशा:
झीसं जन्म कयागु थुगु हलिंया थौंकन्हय्या ख्वाः ग्याःचिकुं भय्बिउ। आपालं मनूतय् नुगः क्वतुं। थः जन्म कयागु थाय् भिना वइ धइगु आशाया जः पिलिपिलि च्याः ला धइगु आसाकुति पह दयाच्वंसां नं आपालं न्ह्यसःतय्सं लिघ्वाना यकाच्वं थें जक। मनुखं सिउ थौंया मनूतय् मति आपाःसिया मभिं। अथे जुयाः भिंगु जुया वनी धइगु थुइका कायेत थाकु। छु धाथें मनूत शान्तिं खयेकाः च्वने सइ ला? हलिंयात नस्वाःगु क्यब दयेके फइ ला? मनूत थःथवं धर्म, रंग, जातिया तःधंचीधं, भेदभाव मदयेकाः सकलें झी छम्ह मनू खः धकाः हना बना तयाः म्वाये मफइ ला? सकलें मनू छम्ह खः धकाः सुयातं नं गुगुं कथं धर्म, रंग, जाति, भाषा आदिया छुं हे बिभेद मयासें सकसितं उतिग्यंक अधिकार, न्याय मदइ ला? थुज्वःगु तःकथंया स्वतुमतु स्वःगु न्ह्यसःत जक ।

थौं बिकसित राष्ट्रय् च्वंपिसं हलिंया ८० प्रतिशत बस्तु, श्रोतसाधन छ्लेगु व सितिं छ्वयेगु यानाच्वन। विकिसित देसय् नयेगु नसात पसःया धुकुती अथें फ्वसा ह्वयेकाः ध्वगिकाः छ्वयाच्वनसा आपालं अविकसित राष्ट्रय् च्वनाच्वंपिं मनूत नये मखनाः तःकथंया ल्वचं कयेकाः, द्यांलाकाः च्वने मालाच्वन। थ्व लु मैत्रयं महात्मापिं लिसें नुगः दुपिं मनूतय्सं नाला काये फइगु खँ मजुल। मैत्रयं धयादी "हलिंया ब्याक्क थासय् मनू म्वायेत माःगु आधारभूत बस्तुत मदु। थुज्वःगु स्थिति गरिब राष्ट्रय् अप्वः दु। थुज्वःगु लुं जितः तसकं नुगलय् स्याकी। दाजुकिजा तताकेहेँपिं, छिकपिंसं थःगु मिखा न्ह्यःने हे थुकथं मनूत सिनाच्वंगु स्वयाः थःत गथे मनू धायेकाच्वने फत?" आः, न्हूगु युगःया ईयात ल्वःकथं मैत्रयं विकसित राष्ट्रतय्त उमित अप्वः जुयाः ज्याख्यले मदयाः सितिं वनींगु बस्तुत गरिबतय्त इना बीत हःपाः बी। दक्व देय्तय्त थःके दूगु श्रोत साधन सकसियां मंकाः यानाः छ्यले दइगु यायेत हःपाः बी, मनूमनू थवं थवय् मतिना ब्याकेत हःपाः बी ।

शान्ति व न्याय धइगु सुं छम्ह बाय् गुगुं बिशेष पुचःया निंतिं जक मखु। शान्ति व न्याय सकसियां निंतिं खः, तर थौं अथे मजुयाच्वन। अथे हे थौ संसारय् न्ह्याथासं समस्या, अन्याय, युद्ध, ख्याच्वः, विनाश, बम आदिया ग्याःचिकु जक। थुपिं जैविक, रासायनिक बम छ्यलाः राष्ट्रतय् दथुइ युद्ध यायेगु धइगु पृथ्वीइ मनूया अस्तित्व मदयेकेगु खः। पृथ्वीं थज्याःगु अवस्था फये मालीगु स्थिति सुनां नं हये मजिउ ।

थौंया संसारय् न्हियान्हिथं स्वतुमतु स्वया वंगु समस्या, युद्ध, द्वन्द्व, अन्याय, अत्याचारया दथुइ थीगु जः जुयाः मनूयात ई कथं न्हूगु शिक्षा बियाः एटलान्तिसया मि सभ्यता सिबें च्वन्ह्याःगु न्हूगु मि सभ्यताया बिकास यानाः लुँ युगय् थ्यंकेत झायादीपिं महात्मापिनि पुचःया नं नायः जुयाः मैत्रय् बुद्ध थुगु थाकुगु ई तरे यायेत मनूतय् दथुइ झायाच्वंगु दु। मैत्रय बुद्धं पृथ्वीया मनूया सेवा यायेगु योजना कथं थःगु खल्ला ज्या�वः नं न्ह्याकेधुंकूगु
दु। मैत्रय मनूत नाप हनाच्वनेत थन कुहां वये न्ह्यः हिमालयय् अथेहे २००० दँ तक च्वनादीगु खः। मैत्रयया सन्देश दु "सकलें मनूतय्त थ्व हलिमय् उमिगु अधिकार कथं स्वास्थ्य उपचार, पाय्छिगु नसा, च्वनेगु बाय्, पाय्छिगु शिक्षा व मनूया इच्छा कथं ह्वःताः दयेमाः।"
थुज्वःगु अशान्ति व स्यालं कयाच्वंगु मनूया नुगलय् आशाया मत च्याकेत मैत्रय वयेधुंकूगु सुखद बुखँ बीगु व प्रचार प्रसार यायेगु ज्या धाःसा मैत्रयया चेला बेलायतया छम्ह पुं, लेखक व भविष्यवेत्ता भाजु बेन्जामिन क्रेमं यानाच्वंगु दु। बेन्जामिन क्रेमं २०�२५ दँ निसें हलिंन्यंक सार्वजनिक प्रवचनपाखें मैत्रय बुद्वया सन्देश, पलाः, आश्चर्य, चमत्कार आदि खँ मनूतय् दथुइ थ्यंकाः न्हूगु युग खंकेत तःधंगु सेवा याना वयाच्वंगु दु ।

(कथहं)

More Stories Like this