रामदेव प्रहरी नियन्त्रणय्, विमानपाखें हरिद्वार यंकल

भारत (एजेन्सी)

भारतया रामलीला मैदानय् अनसनय् च्वनाः वयाच्वंम्ह योग गुरु रामदेवयात प्रहरीं नियन्त्रणय् काःगु दु । रामदेव दिल्लीया सफदरजंग थानाय् दुगु भारतीय सञ्चार माध्यमतय्सं जानकारी ब्यूगु खः । प्रहरीं वय्कःयात विमानपाखें हरिद्वार यंकूगु नापं सञ्चार माध्यमपाखें जानकारी ब्यूगु खः । प्रहरीं धाःसा रामदेवयात ज्वंगु मजुसे सुरक्षाया कारण उगु थासं चीकेगु ज्या जक जूगु दावी याःगु दु । भारतय् आपालं भ्रष्टाचारया विरोधय् शनिवाःनिसें दिल्लीया रामलीला मैदानय् अनिश्चितकालिन अनसन न्ह्याकूम्ह रामदेवयात प्रहरीं नियन्त्रणय् कयाः वय्कःया समर्थकतय्त उगु थासं चीकूगु खः । उगु झ्वलय् प्रहरी हस्तक्षेपपाखें थ्यंमथ्यं स्वीम्ह धइथे मनूत घाःपाः नापं जूगु उगु हे सञ्चार माध्यमपाखें जानकारी ब्यूगु दु । थ्वहे दथुइ स्वामी रामदेवया अनसन त्वाःथःगु धासें भारतीय जनता पार्टीं देय्न्यंक नीप्यघौया धर्ना घोषणा याःगु दु । भाजपाया नायः नितिन गडकरीं रामलीला मैदानय् जूगु हस्तक्षेपप्रति कडारुपं विरोध यासें सनिलया न्ह्यताः इलंनिसें नीप्यघौतक्क धर्ना बिइगु जानकारी ब्यूगु खः । गडकरीं सरकार संकटकाल तयेगु तयारीइ दुगु धासें रामलीला मैदानय् जूगु घटनाप्रति प्रधानमन्त्री मनमोहन सिंह व कांग्रेस आइया नकिं सोनिया गान्धीं क्षमा Ïवनेमाःगु धाःगु दु ।

More Stories Like this