जलस्येँ मिया आइप्याड

मनूतय् इच्छा नं गजब गजबया हे जुयाच्वनीगु खनी । उकि नं थौं कन्हय्या सूचना प्रविधिया जमानाय् न्हू न्हूगु प्रविधिया सामान छ्यलेत मनूत तस्कं हे लालाहित जुइगु जुयाच्वन । अज्या:गु ज्याया निंतिं मनूत न्ह्यागू नं यायेत तयार खनेदयावःगु दु ।

अज्या:गु हे छगू अजुचा:गु घटना छुं दिं न्ह्य: चीन हे जुल । छम्ह चिनियाँ विद्यार्थीं थःगु जलस्येँ (किड्नी) हे मिया आइप्याड न्यात । एप्पल कम्पनीया सामान प्रति तसंक रुची दुम्ह झिंन्हय्दँया स्याउ चङ्ग नांया उम्ह विद्यार्थीं आइप्याद न्यायेत ध्यबा जुटे यायेगु निंतिं थःगु जलस्येँ हे मिउगु खः ।

इन्टरनेटय् अवैध रुपं जलस्येँ व्यपार याइपिनि विज्ञापन खनेवं चङ्गं इपिं नाप स्वापु तयाः थःगु अंग मिउगु खः । थःगु जलस्येँ मिउगु बापत वयात ३ हजार ३९२ डलर बिउगु जुयाच्वन । लिपा अस्पतालं डिस्चार्ज जुइवं चङ्गं आइप्याड २ व ल्याटप छग: न्यात ।

तर थ्व खँ तब जक सार्वजनिक जुल गुबलय् चङ्गया मां नं थुकिया बारे सीकल । वया मांयात थः काय् नं न्हू न्हूगु सामान गनं हल धकाः शंका जुल । लिपा थःगु काय्या म्हय् अपरेशन याःगु दाग नं खनेवं चाङ्गं थःम्ह जलस्येँ मियागु खँ स्वीकार याःगु खः ।

चीनय् थःगु शाररीक अंग मीगु ज्या अवैध जूसां अंग दान याइपिं म्हो जुइवं अज्याःगु अवैध व्यापार अप्वःगु दु ।

More Stories Like this